Samsung brendinin yeni flaqman Galaxy S24 seriyası ilə birlikdə təqdim edilən Galaxy AI xüsusiyyətlərinin hansı modellərə gələcəyi açıqlanıb. Ümumiyyətlə, Galaxy AI xüsusiyyətlərinin iki kateqoriyası var. Bunlara cihazda və ya buludda olan “AI” imkanları aiddir. Cihazda olan funksiyalar yalnız prosessor gücündən istifadə etməklə işləyir, bulud funksiyaları isə Samsung servislərinin işi görməsini tələb edir və bununla da internet bağlantısı tələb olunur. Daha əvvəllər Galaxy AI-nin bir çox Samsung cihazına əlavə ediləcəyi iddia edilsə də, indi vəziyyət biraz fərqlidir.
Ötən günlərdə keçirilən Galaxy Unpacked tədbirinin ən maraqlı anlarından biri məhz Galaxy AI xüsusiyyətlərinin təqdim edildiyi an idi. Habelə Samsung şirkəti Galaxy AI xüsusiyyətlərinin köhnə cihazlara da əlavə ediləcəyini açıqlaması Samsung həvəskarlarının sevincinə və marağına səbəb olmuşdu. İndi isə açıqlanıb ki, Galaxy AI heç də gözlənildiyi kimi bütün cihazlara gəlmir. Belə ki, yeni Galaxy AI sadəcə Galaxy S23 seriyası, Tab S9, Z Fold 5 və Z Flip 5 ilə məhdudlaşa bilər. Ən son paylaşılan məlumatlar göstərir ki, bu dəstək 2023-cü ildə və sonra istehsal edilən modellərlə məhdudlaşacaq.
Galaxy AI xüsusiyyətləri Galaxy S22 seriyasına belə əlavə edilməyəcək. Bunun əsas səbəbi kimi isə çipset yox bulud yükü göstərilir. Bildiyiniz kimi, “Galaxy AI” cihaza inteqrasiya olunmuş süni intellekt imkanlarından əlavə, üçüncü tərəfin bulud xidmətlərindən də dəstək alır. Buna görə də siyahıya əlavə edilən hər bir cihaz buludda daha çox yük istifadə edə bilməlidir. Qeyd edək ki, Samsung süni intellekt istifadənin hələlik hansı nəticələr doğuracağını bilmədiyi üçün bu tərəfdə olan yeniliklər tədricən etdiyini bildirib. Məhz bu səbəbdən Galaxy AI-nin köhnə cihazlara gəlməsi ehtimalı hələ də var.
