WhatsApp-ın reklam inteqrasiyası üzərində işlər davam edərkən, Meta tərəfindən üzərində işlənilən başqa bir seçim ortaya çıxıb. Tətbiqin yeni versiyalarında tapılan koda görə, WhatsApp-a reklamsız ödənişli abunə modeli gəlir. Beləliklə, Meta reklamlardan narahat olan istifadəçilər üçün pullu alternativ təklif etməyə hazırlaşa bilər.
WhatsApp-ın yeni 2.26.3.9 versiyasının araşdırılması zamanı Status və Kanallar bölmələrindəki reklamları silməyi hədəfləyən abunə bəyanatları aşkar edildi. Tətbiqdəki mətnlər reklamları tamamilə deaktiv edən abunə seçiminin sınaq mərhələsində ola biləcəyini göstərir. Yadınızdadırsa, WhatsApp ötən il Status və Kanallar bölməsində reklamlar göstərməyə başladı və bu qərar istifadəçilər tərəfindən ciddi şəkildə tənqid olundu. Buna baxmayaraq, Meta reklam siyasətindən geri çəkilmək əvəzinə, istifadəçilərə pullu bir həll təklif etməyi planlaşdırır.
Abunə haqqı, əhatə dairəsi və ya hansı ölkələrdə təklif olunacağı barədə hələlik dəqiq məlumat yoxdur. Bununla belə, Meta-nın əvvəllər Facebook və İnstaqramda oxşar reklamsız abunəliklər təqdim etdiyi, lakin yalnız müəyyən bölgələrdə olduğu məlumdur. Buna görə də, WhatsApp-da reklamsız abunəliyin də qlobal miqyasda deyil, tədricən tətbiq olunacağı ehtimal olunur. WhatsApp-dan hələlik rəsmi təsdiq yoxdur.
