İnnovasiya və Rəqəmsal İnkişaf Agentliyi (İRİA), Bakı Şəhəri Nərimanov Rayon İcra Hakimiyyəti və “Tedspace” şirkətinin birgə təşkilatçılığı ilə həyata keçirilən “Openwave” Açıq İnnovasiya proqramının ilk irimiqyaslı hakatonu öz işini uğurla yekunlaşdırıb.
Dövlət-vətəndaş əməkdaşlığını rəqəmsal müstəviyə daşıyan bu tədbir gənc istedadların və texnologiya ekosisteminin böyük marağına səbəb olub.
48 saat davam edən intensiv kodlaşdırma və ideya inkişafı prosesi ərzində seçilmiş ən güclü 15 komanda Nərimanov rayonunun real problemlərinin həllinə yönəlmiş rəqəmsal platformalar və işlək prototiplər ərsəyə gətiriblər. İştirakçılar onlara veril’n aktual mövzularda layihələr işləyərək aidiyyəti qurumların idarəetmə proseslərini asanlaşdıracaq mexanizmlər təklif ediblər.
Tədbirin yekununda baş tutan Qrand Final mərhələsində komandalar öz layihələrini peşəkar münsiflər heyəti qarşısında təqdim ediblər. İdeyanın aktuallığı, texniki icra səviyyəsi, innovativ yanaşma və istifadəçi təcrübəsi (UX/UI) kimi qabaqcıl meyarlar əsasında aparılan şəffaf qiymətləndirmənin nəticəsinə əsasən, 10 000 AZN dəyərində ümumi mükafat fondunu qazanan ilk 3 komanda məlum olub:
- 1-ci yer (5.000 AZN): “Digi Solution” komandası
- 2-ci yer (3.000 AZN): “ExaMinds” komandası
- 3-cü yer (2.000 AZN): “Conflict” komandası
İlk üçlüyə daxil olan komandalar hazırladıqları innovativ həllərlə ərazinin idarəedilməsində hesabatlılığın rəqəmsallaşdırılması, vətəndaşlarla operativ ünsiyyətin qurulması və infrastruktur problemlərinin avtomatlaşdırılmış şəkildə qeydiyyatı sahəsində ən effektiv nəticələri nümayiş etdiriblər.
“Openwave” platforması çərçivəsində gələcəkdə də dövlət qurumlarının qapılarının açıq innovasiyalara və gənc texnologiya mütəxəssislərinin ideyalarına açıq olacağı vurğulanıb.
