Smartfonların qiyməti bəzilərimizin aylıq qazancından belə qat-qat yüksəkdir deyə hər birimiz cihazımızı maksimum dərəcədə qorumaq istəyirik. Bir smartfonu da uzunömürlü edən əsas şeylərdən biri onu kənar təsirlər, zədələrdən qorumaqdır. Smartfon zamanla nə qədər yavaşlasa da fərqli bir əməliyyat sistemi yükləyərək, formatlayaraq və.s ən azından performansı biraz yaxşılaşdıra bilərsiniz. Lakin cihaz fiziki olaraq zədələndikdə çəkiləcək xərc və əziyyət daha çox olur. Smartfona ən çox problem yaradan kənar təsir isə su ilə təmas ola bilər. Su ilə təmas etmiş smartfonda zədələnən hər hansısa bir detal cihazı ümumiyyətlə bərpa edilməyəcək vəziyyətə gətirə bilir. Ona görə də istehsalçılar smartfonları suya qarşı davamlı olacaq şəkildə hazırlayırlar. Hətta Samsung kimi böyük şirkətlər suya qarşı davamlılığı reklam strategiyalarının parçası kimi də istifadə edirlər. Amma bu reklamlar bəzən həqiqəti doğru ifadə etmədiyi üçün nəticəsi biraz acınacaqlı olur. Belə ki, Samsung şirkəti bu reklamları ucbatından 9,7 milyon dollar cərimələnib.
Samsung 7 fərqli modelin reklamındakı yanlış yönləndirmə ilə bağlı cərimələnib
Smartfonların suya və toza qarşı dayanıqlılığını IP sertifikatının növü təyin edir. Məsələn, cihazın IP5X toz qarşı dayanıqlı olduğunu, IP6X toza qarşı tamamilə dayanıqlı olduğunu göstərir. IPX7 isə 30 dəqiqə təyin edilmiş temperatur və təzyiqdə suya dayanıqlı olduğunu, IPX8 isə eyni şəraitdə vaxt fərqi olmadan dayanıqlı olduğunu ifadə edir.
Samsung Australia, 2016-cı ildən 2018-ci ilə qədər 7 fərqli Samsung smartfonunun hovuz və dənizdə işlədilə biləcəyi ilə bağlı mağaza posterləri və sosial media reklamları hazırlayıb. Həmin smartfonlar isə Galaxy S7, S7 Edge, A5 (2017), A7 (2017), S8, S8 +, Note 8 modelləridir. Reklamlarda hovuz və dəniz göstərilərək istifadəçilərin yanlış yönlədirilməsi səbəbilə Samsung 9,7 milyon dollar cərimələnib. Avstraliyanın Rəqabət və İstehlak Komissiyası (ACCC) bildirib ki, Samsung Australia smartfonlarla bağlı bu yanlış iddiaları qəbul edib.
Düşünə bilərsiniz ki, heç bir insan bu reklama görə smartfonu aparıb hovuza və ya dənizə salmaz. Lakin istifadəçilərdən suya məruz qalmış cihazların normal işləmədiyi və hətta tamamilə yararsız vəziyyətə düşdüyü ilə bağlı şikayət qeydə alınıb. ACCC problem yaşayan insanların Samsung Australia ilə əlaqə saxlamasını məsləhət görür.
