2007-ci ildə Kaliforniya startapı tərəfindən təqdim edilən günəş enerjisi ilə işləyən avtomobil Aptera istehsala bir addım daha yaxınlaşır. Belə ki, günəş enerjisi ilə işləyən Aptera adlı konsept avtomobil sürüş testindən uğurla keçməyi bacarıb.
Aptera ilk aşağı sürətli funksiya testini tamamlayıb və istehsala bir addım daha yaxınlaşıb. Futuristik görünüşü ilə iki nəfərlik avtomobil tamamlandıqda 1600 km-ə qədər məsafə qət edəcək. Bundan əlavə, onu heç şarj etmədən də istifadə etmək mümkündür. Aptera Motors, tam günəş enerjisi ilə işləyən elektrik avtomobili (sEV) Aptera-nın real şəraitdə aşağı sürətlə sürüş sınaqlarını başa çatdırıb. Sürüş testində istifadə edilən avtomobilin istehsaldan əvvəlki versiyası olan “PI-2”, şarj üçün elektrikə ehtiyacı olmayıb. Avtomobil ancaq günəş enerjisindən istifadə edib.
Yaxın gələcəkdə o, ümumi performans xüsusiyyətlərini və km başına vatt-saat, günəş enerjisi ilə doldurulma dərəcələri və təxmin edilən batareya diapazonu kimi əsas səmərəlilik göstəricilərini təsdiqləmək üçün yüksək sürətli sürüş testindən də keçəcək. Aptera, üstündəki 700 Vatt gücündə günəş panelləri sayəsində günəşli gündə günəş enerjisi ilə 64 kilometr yol qət edə bilir. 42 kVt/saatlıq batareyaya sahib olan və ilin müxtəlif dövrlərində şarj edilmədən istifadə olunan bu avtomobil 643 km mənzilə sahibdir. Qeyd edək ki, 0.13 sürtünmə əmsalına sahib olan avtomobilin elektrik mühərriki 201 at gücü və 310 nm fırlanma anı hasil edir. Avtomobilin maksimal sürəti 160 km/saatdır və 100 km/saat sürətinə sadəcə 4 saniyəyə çatır. Hal-hazırda ilkin sifariş mərhələsində olan Aptera, Launch Edition versiyası ilə birlikdə 30.700 dollardan başlayan qiymət ilə təklif olunur.
