İnnovativ məhsullar yaratmaq üçün keçirilən, Azərbaycanın ən böyük 48 saatlıq texnologiya yarışmalarından biri “PASHA Hackathon 4.0” baş tutdu!
Belə ki, “PASHA Hackathon 4.0” yeni ideyalar yaratmağa təşviq etmək məqsədi daşıyan 48 saatlıq yarışması kimi artıq 4-cü ildir təşkil olunur. “Hackquarters” ilə, “PASHA Holding” əməkdaşlığında baş tutan hakaton tələbələri, biznes və marketinq mütəxəssislərini, dizaynerləri və koderləri mövcud iş prosesindəki problemləri həll etməyə və “PashaPay” tərəfindən həyata keçirilən yeni ideyalar yaratmağa təşviq etmək məqsədi daşıyırdı. Bu sahədə olan və ya bu sahəyə marağı olanlar insanlar hakatonda bir yerə toplanaraq innovativ biznes ideyalarını və öz konsepsiyalarını yaratma imkanına malik oldular.
“PASHA Hackathon 4.0” hansı tapşırıqları bərabərində gətirdi?
“PASHA Hackathon 4.0” bu il də olduqca maraqlı və innovativlik tələb edən problemlərə həll yolu axtarırdı:
Oflayn QR, NFC və s. istifadə edərək yerli ödənişləri təkmilləşdirmə
Burada, “Apple Pay”-in rahatlıq və sürət səviyyəsinə nail olmaq üçün QR ödəniş sistemlərinin təkmilləşdirilməsi, həmçinin m10-dan istifadə zamanı internet tələb olunmaması ilə bağlı həllər araşdırıldı.
Bütün terminallarda müştərinin m10-a keçidini sürətləndirmə
Bu tapşırıq müştəri bazasının m10 platformasına keçməsi üçün hərtərəfli planın yaradılmasından ibarətdir. Məqsəd genişləndirilə bilən, “user-freindly” olan və bütün əlçatan terminallardan istifadə edərək müştəriləri m10-a keçməyə təşviq edən bir həll dizayn etməyi araşdırdı.
Mikro və KOB seqmentlərinin ehtiyaclarına uyğunlaşdırılmış dəyər təkliflərini müəyyən etməklə və nağd pul əməliyyatlarından asılılığı aradan qaldırmaqla onların əldə edilməsini strateji olaraq hədəfləmə
Bu, qismən/tam qeyri-rəsmi və ya “boz/qara” iqtisadiyyatda fəaliyyət göstərən, tez-tez nağd puldan istifadə edən mikro sahibkarların/KOB-lərin müəyyən edilməsini və işə cəlb olunmasını əhatə etdi.
28, 29, 30 İyun tarixlərində keçirilən “PASHA Hackathon 4.0” öz sahəsində yüksək ixtisaslı 45-dən çox mentorun iştirak ilə ideya sahibləri üçün yüksək səviyyəli dəstək göstərdi. Hakatonun ilk günü açılış və komandaların məlumatlandırılmasından sonra API-lər və onlardan istifadə qaydaları, MVP-nin ortaya çıxarılması üzrə təlimlər diqqət çəkdi. 29 İyunda isə öz sahəsinin yüksək təcrübəli mentorlarının iştirakı ilə keçirilən “mentorluq sessiyaları”, komandalara lazımi tövsiyələr qazandırdı. Günün sonuna doğru bizləri yekun ideyaların video nümayiş olunacağı tamamlanma və sertifikatların təqdim olunması mərasimi qarşıladı.
Son gün isə ən həll edici məqam olub finalist komandaların seçilməsi, demoday və münsiflər heyətinin qiymətləndirməsindən sonra qalib komandalar, o cümlədən mükafat mərasimi baş tutdu.
Beləliklə, “PASHA Hackathon 4.0” qalibləri rəsmi olaraq bəlli oldu. Hakatonda uğurla irəliləyib finala qalan komandalar arasından top 3 komanda pul mükafatı qazandı. Birinci yerin qalibi olan “Untitled” komandası 6000 AZN, ikinci yer olan “YUJITech” komandası 4000 AZN, üçüncü yer olan “Blackwater” komandası 2000 AZN mükafat ilə hakatondan ayrılmaq imkanına sahib olublar. Eyni zamanda birinci yerə çıxmış komanda InMerge Innovation Summit üçün də iştirak hüququ əldə etdi.
Bu qiymətləndirmə kriteriyası hakaton zamanı təqdim olunan həllərin orijinallığını və ixtiraçılığını dəyərləndirir. Hakimlər, problemləri həll etmək üçün unikal yanaşmanı göstərən növbəti və qeyri-ənənəvi fikirlər nəzərdən keçirir. Yeni konseptləri, yaradıcı problem həllərini və qeyri-standart düşünmə nümayiş etdirən həllər bu kateqoriya altında qalibiyyəti ələ alır. Nəticə etibarilə qalib olmaq üçün yenilikçilik və yaradıcılıq, istifadəçi rahatlığı, texniki mümkünlük, kommersiyalaşdırma imkanı və bütün bunlar üçün komanda tərtibatı nəzərə alınır.
Jüri qismində “PAŞA Pay”-in İdarə Heyətinin Sədri Samir Məmmədov, “PAŞA Pay”-in İdarə Heyəti Sədrinin Müavini Pünhan Nərimanov, “PAŞA Pay”-in Marketinq Departamentinin Rəhbəri Əntiqə Tağıyeva, “PAŞA Pay”-in Baş Biznes İnzibatçısı Rəşad Həsənli, “PAŞA Pay”-in Məhsul Üzrə Sahə Lideri Murad Qarayev, “PAŞA Pay”-in Məhsul üzrə Ekspert Rəhbəri İqbal Rüstəmov və o cümlədən “Future Lab”-in CEO-su Fərrux Əliyev və “Tenity”-nin Baş Kommersiya Direktoru Kaan Akın komandaları qiymətləndirdilər.
“PASHA Hackathon 4.0” həyat qabiliyyətli və innovativ biznes ideyaları, məhsul konsepsiyaları yaratmaq üçün böyük şəhərlərdən yerli texnoloji icmaları bir araya gətirdi. Eyni zamanda sektora xas yeni biznes imkanları yaratmaq və bu imkanların bazara çıxma müddətini sürətləndirməyə dəstək göstərdi.
