Samsung, bütün ekranın barmaq izi oxuyucusu kimi işlədiyi bir patent üçün müraciət edib. Belə ki, şirkətin gələcək qatlana bilən smartfonları bu texnologiyadan istifadə edə bilər. Samsung hazırda inqilabi yenilik edə biləcək tam ekran barmaq izi oxuyucusu üzərində çalışır.
Bildiyimiz kimi, Samsung brendi tezliklə altıncı nəsil qatlanan smartfonlarını təqdim edəcək. Bununla belə, şirkət, yeni nəsil qatlana bilən smartfonlarında istifadə üçün yeni patentlər almağa davam edir. Yeni patent müraciəti Samsung-un müəyyən bir sahə əvəzinə bütün ekranı barmaq izi oxuyucusu kimi istifadə etməyi planlaşdırdığını ortaya qoyur. Patentə əsasən, ekran panelinin altında barmaq izlərini oxuyan sensor təbəqəsi var. Bu, telefonun kilidini açmağı xeyli asanlaşdırır. Qeyd edək ki, sensor təbəqənin xarici işıq mənbəyinə ehtiyac olmadan barmaq izini oxuya biləcəyi də bildirilir.
Samsung-un hazırkı qatlana bilən smartfonlarında yan tərəfdəki güc düyməsinə inteqrasiya olunmuş barmaq izi oxuyucusu var. Yeni patentlə isə biz tezliklə tam ekran barmaq izi oxuyucusuna sahib smartfonlarla rastlaşa bilərik. X platformasından xleaks7 istifadəçisi bildirir ki, yeni texnologiya gələn il buraxılacaq Galaxy Z Fold 7 kimi qatlana bilən smartfonlara daxil edilə bilər. Təbii ki, texnologiya çox yeni olduğu üçün bu iddiaya şübhə ilə yanaşmaqda fayda var.
