Beləliklə, bu gündən yəni 1 iyul tarixindən etibarən Azərbaycanda nəqliyyat sözün əsl mənasında daha baha olur. Belə ki, 1 iyul tarixindən etibarən ölkəmizdə daha əvvəl xəbər veriyimiz kimi taksi fəaliyyəti ilə bağlı qanunlar qüvvəyə minir. Bundan əlavə, ötən gücə tarif şurası daha bir neçə dəyişikliyi elan edib. Belə ki, bu gündən etibarən ölkədə Aİ-92 markalı benzinin qiyməti 1.10 AZN, dizelin qiyməti 1 AZN təyin edilib. Bununla yanaşı, Aİ-95 markalı benzinin qiyməti 40 qəpik ucuzlaşaraq 1.60 AZN olub.
![Azərbaycanda nəqliyyat](https://tedroid.com/media/2024/05/1-iyun-taksi-minimal-gedishaqqi-4.50.jpg)
Qeyd edək ki, Rəqəmsal İnkişaf və Nəqliyyat Nazirliyi tərəfindən ictimai nəqliyyat və hava nəqliyyatı ilə ölkədaxili sərnişindaşıma xidmətləri üzrə tariflər yenilənib:
- Müntəzəm şəhərdaxili (rayondaxili) avtobus marşrutlarında sərnişindaşıma xidmətlərinin tariflərinin yuxarı həddi məsafədən asılı olmayaraq 50 qəpik
- Metro nəqliyyatında sərnişindaşıma xidmətinin tarifi bir gediş üzrə 50 qəpik
- Müntəzəm şəhərlərarası avtobus marşrutlarında sərnişindaşıma xidməti üzrə tarifin yuxarı həddi bir kilometr üçün 3,7 qəpik
![Azərbaycanda nəqliyyat](https://tedroid.com/media/2024/07/azerbaycanda-neqliyyat-daha-baha-1-1024x576.jpg)
Taksi fəaliyyəti ilə bağlı olan qərarlara nəzər salsaq, bu gündən etibarən buraxılış tarixindən 8 ildən artıq müddət keçmiş avtonəqliyyat vasitələrinə buraxılış kartı verilməyəcək. Həmçinin qeyd edilən tarixdən sonra buraxılış kartı almaq üçün təqdim olunan avtomobillər 2024-cü ilin iyul ayının 1-dən sonra ölkəmizə idxal edilmişdirsə və ya ölkəmizdə istehsal olunmuşdursa, onların rəngi ağ və ya qırmızı olmalıdır. Müvafiq icazəsi olmayan hüquqi şəxslər və ya fərdi sahibkarlar, eyni zamanda icazəsi olmayan şəxslərə sifariş ötürən taksi sifariş operatorları barəsində İnzibati Xətalar Məcəlləsinə uyğun olaraq müvafiq qaydada inzibati tənbeh tədbirləri görüləcək.
Qeyd edək ki, vətəndaşın avtomobili 2012-ci il istehsalıdırsa, 1 iyul 2024-cü il tarixinə kimi icazə üçün müraciət edibsə, üç illik icazə ala biləcək. Bu halda rəng tələbi tətbiq edilmir. Bundan əlavə, Rəqəmsal İnkişaf və Nəqliyyat nazirliyi tərəfindən hava nəqliyyatı ilə ölkədaxili sərnişindaşıma xidmətlərinin tariflərinin yuxarı hədləri (əks istiqamət üzrə eyni olmaqla) müəyyən edilib:
1. | Bakı-Naxçıvan / Naxçıvan-Bakı | 70.00 |
2. | Naxçıvan-Gəncə / Gəncə-Naxçıvan | 60.00 |
3. | Bakı-Gəncə / Gəncə-Bakı | 84.00 |
4. | Bakı-Qəbələ / Qəbələ-Bakı | 65.00 |
5. | Bakı-Füzuli / Füzuli-Bakı | 78.00 |
6. | Bakı-Zəngilan / Zəngilan-Bakı | 83.00 |
7. | Bakı-Lənkəran / Lənkəran-Bakı | 65.00 |
8. | Bakı-Zaqatala / Zaqatala-Bakı | 84.00 |
Bu qərarın qəbul edlməsini əsaslandıran səbəblərə gəldikdə, əvvəlki tariflər xidmət keyfiyyətinin artırılması, avtobus parkının yenilənməsi və nəqliyyat vasitələrinin daim saz vəziyyətdə saxlanmasına imkan vermirdi. Məhz bu səbəbdən də belə bir addım atılmasına zərurət yaranıb. Tariflərin yenilənməsi zamanı dövlətin sosial siyasətinə uyğun olaraq, sosialyönümlülük nəzərə alınmaqla ən optimal tarif dəyişikliyi edilib.
Bəs yeni tariflərin yaratdığı imkanlar nədən ibarətdir?
Birincisi, xidmət keyfiyyəti və müştəri məmnuniyyətinin artırılması
İkincisi, istehlakçı ilə xidmət göstərən tərəflərin maraqlarının uzlaşdırılması
Üçüncüsü, xidmətin dayanıqlılığının və iqtisadi əlverişliliyin təmin olunması
Dördüncüsü, ölkədaxili sərnişindaşıma xidmətləri üzrə davamlılığın təmin edilməsi, keyfiyyətin yüksəldilməsi
Beşincisi, avtobus parklarının yenilənməsi, metro infrastrukturunun genişləndirilməsi
Altıncısı, vətəndaşların ictimai nəqliyyatdan daha rahat istifadəsinə səbəb olan yeni sərmayələrin cəlbi.
Müntəzəm şəhərdaxili (rayondaxili) və şəhərlərarası avtobus marşrutlarında, metro nəqliyyatında tariflərin tətbiqində optimal variantın seçilməsinə diqqət etmək.
Report.Az qeyd edir ki, son illər nəqliyyat sahəsində aparılan dövlət siyasəti ölkənin sosial-iqtisadi inkişafı, əhalinin rifahının yüksəlməsi və dövlətin iqtisadi qüdrətinin artmasına yönəlib. Tək bu il ərzində yalnız Bakı şəhərində 200-dən çox avtobus istismara verilib. İl ərzində isə 160 elektrik avtobusunun sərnişinlərin xidmətinə verilməsi planlaşdırılır. Xidmət səviyyəsinin yüksəldilməsi, daha rahat və sürətli daşınmanı təmin etmək məqsədilə Bakıda 21 küçə və prospektdə uzunluğu 65 km olan xüsusi avtobus zolaqları təşkil edilib. Avtobus zolaqlarının davamlılığının təmin edilməsi, həmçinin yaşayış məntəqələri və mühüm nəqliyyat dəhlizlərini əhatə edən zəncirvari şəbəkənin təşkili üçün bu il daha 31 küçə və prospekti əhatə edən 44 kilometr uzunluğunda avtobus zolaqlarının təşkili həyata keçiriləcək.