Göydələnləri ilə məşhur olan Yaponiyada zəlzələyə davamlı ən hündür göydələn olan Mori JP Tower inşa edilib. Beləliklə, 325 metrlik Mori JP Tower Yaponiyanın 9 bal gücündə zəlzələlərə tab gətirə bilən ən hündür göydələni oldu. Pelli Clarke & Partners tərəfindən layihələndirilən bina Tokionun ən perspektivli məhəllələrindən birində yerləşir. Qeyd edək ki, Mori JP Tower 64 mərtəbəli yaşayış və ofis sahəsinə malikdir, son 11 mərtəbə isə lüks Aman rezidensiyaları üçün ayrılmışdır.
9 bal gücündə olan ən dağıdıcı zəlzələyə belə davamlı olan ən hüdür göydələn ən hündür binaların ümumi reytinqində yalnız 134-cü yerdədir. Ümumiyyətlə, göydələnlərin hündürlüyü artdıqca onların inşası və davamlılığı da çətinləşir. Bunun ən əsas səbəblərindən biri də məhz küləkdir. Hətta dünyanın ən hündür göydələninin belə ən hündür mərtəbələri olduqca fərqli dizaynla inşa edilib ki, bu da onun küləkdən təsirlənməsini minimuma endirir.
Bildiyimiz kimi, Yaponiyada zəlzələlər qeyri-adi deyil. Binanın belə şəraitə tab gətirə bilməsini təmin etmək üçün Pelli Clarke & Partners yüksək möhkəm betonla doldurulmuş konstruktiv polad borulardan istifadə etmiş və bir neçə damper quraşdırmışdır. Şirkət həmçinin 3600 nəfərlik müvəqqəti sığınacaq və ilk yardım ləvazimatları üçün anbar da layihələndirib. Mori JP Tower mühəndisləri bildirib ki, “Bina konstruksiyasını sabitləşdirmək üçün yüksək möhkəmliyə malik polad və beton komponentlərdən istifadə edilib. Zəlzələ zamanı vibrasiyanın ən çox azaldıla biləcəyi ərazilərdə vibrasiyaya nəzarət cihazları quraşdırılıb. Bu, göydələni təkanlara davamlı edir”.
Qeyd edək ki, Mori JP Tower-in yanında daha iki hündür qüllə var. Bina şirli fasadı və çiçəyi xatırladan simmetrik forması ilə diqqət çəkir. Hündürmərtəbəli bina “yaşıl” inkişafa malik perspektivli eko-rayon olan Azabudai Hills kompleksində yerləşir. Bütün elektrik enerjisi bərpa olunan mənbələrdən alınır və yağış suları ağac və kolların suvarılması üçün saxlanılır və təmizlənir.
