Ayda Dəmiryolu dedikdə bəziləri zarafat olduğunu düşünsə də, Northrop Grumman və DARPA bunun üçün müqavilə imzaladıqlarını açıqlayıblar. Beləliklə, NASA və digər kosmik agentliklər astronavtların Ayda yaşamasını və orada daimi baza yaradılmasını istəyir. Ancaq bunun baş verməsi üçün Ayda enerji, nəqliyyat və rabitə kimi maneələri aşmaq lazımdır. Bu kontekstdə ABŞ Müdafiə Nazirliyinin araşdırma agentliyi olan DARPA-ya insanların uzunmüddət Ayda necə yaşayacaqlarını və bu iqtisadiyyatı necə inkişaf etdirəcəklərini öyrənmək tapşırılıb.
DARPA ABŞ-ın aerokosmik və müdafiə texnologiyaları şirkəti Northrop Grumman ilə Ayda Dəmiryolu sazişi imzalayıb. Qeyd edək ki, DARPA, Northrop Grumman-a kosmosda ilk dəmiryolu konsepsiyasını hazırlamaq üçün tapşırıq verib. Northrop Grumman açıqlamasında bildirib ki, layihə reallaşarsa, bu dəmiryolu, yerin təbii peykində insanları, materialları və kommersiya yüklərini daşıyacaq. İlkin mərhələdə şirkət dəmir yolunu çəkməyəcək, bunun fiziki və maliyyə cəhətdən mümkün olub-olmadığını araşdıracaq.
Ayda Dəmiryolu ideyası əslində çox fantastik görünsə də, əslində onun arxasında çox əsaslı bir məntiq var. Astronavtlar 1969-cu ildə sükut dənizinə enərkən belə, Ayda daimi insan varlığını təmin etmək üçün bir infrastrukturun lazım olacağı başa düşülürdü. Bura su buz mədənləri, atom elektrik stansiyaları, fabriklər və dəmir yolları daxildir. Bu ehtiyaclar əslində Ayın ölçüsündən qaynaqlanır. Bəli, Ay planetimizlə müqayisədə kiçik olsa da, əslində çox böyük bir torpaq parçasıdır. Ayın səthi təxminən 38 milyon kvadrat kilometr olduğu halda, Afrika təxminən 30 milyon kvadrat kilometrdir. Başqa sözlə, nəqliyyat infrastrukturu daimi məskunlaşma üçün mütləq vacibdir.
Bu nöqtədə ənənəvi dəmir yolları və ya maqnetik dəmir yolları olduqca məntiqli görünür. Xüsusilə, maqnit dəmir yolu ideyası daha məntiqlidir, çünki o, Ayın ən böyük problemi olan tozları insanlardan və strukturlardan uzaq tuta bilər. Məlum olduğu kimi, Ay tozu və ya torpağı olduqca zərərli hesab olunur. Belə ki, bu toz insanlara və strukturlara zərər verir. Northrop Grummana belə bir Ay dəmiryolu şəbəkəsinin yaradılması üçün tələb olunan sistemləri, resursları, proqnozlaşdırıla bilən xərcləri, riskləri müəyyən etmək və dəmir yolu xəttinin tikintisi, yoxlanılması, saxlanması və təmiri kimi məsələlərə cavab tapmaq tapşırılıb.
