WhatsApp tərtibatçıları Android istifadəçiləri üçün yeni autentifikasiya funksiyasını elan ediblər. Tezliklə istifadəçilər yeni cihazda öz hesablarına daxil olmaq üçün SMS kodu daxil etməyə ehtiyac duymayacaqlar. Şirkət WhatsApp üçün Passkey adı verilən bu funksiyanın necə işləyəcəyini izah edib.
Sözügedən xəbər messencerin X sosial şəbəkəsindəki rəsmi hesabında dərc olunub. Tərtibatçıların verdiyi məlumata görə, tezliklə Android cihazların sahibləri SMS mesajı ilə alınan kodun əvəzinə digər proqramlar kimi “WhatsApp” profilinə daxil olmaq üçün barmaq izindən, üz skanerindən istifadə edə və ya qadcetinin PIN kodunu daxil edə biləcəklər.
Yeni funksiya qarşıdakı həftələrdə və ya aylarda regiondan asılı olaraq WhatsApp-ın stabil quruluşunda görünəcək. Tərtibatçılar hələlik tətbiqin iOS versiyasına belə bir avtorizasiya metodunun əlavə edilməsinin mümkünlüyünü açıqlamayıblar.
WhatsApp tətbiqinə əlavə edilən Passkey dəstəyinin əsas məqsədi SMS-in əlçatan olmayaraq problem yaratdığı bölgələrdə istifadəçilərin işini asanlaşdırmaq və eyni zamanda təhlükəsizliyi artırmaqdır.
