Samsung M seriyalı cihazları öz xüsusiyyətlərinə görə bəzən diqqət çəkməyi bacrır. 2022-ci ilin aprelində təqdim edilən Galaxy M53 hazırda Galaxy M seriyasının ən son modelidir. Cənubi Koreya texnologiya nəhənginin tezliklə M53 modelinin davamı olacaq M54 modelini təqdim etməyə hazırlaşır. Vyetnamın “The Pixel” adlı YouTube kanalı Galaxy M54 modeli ilə bağlı texniki xüsusiyyətləri açıqlayıb.
Galaxy M54 hansı xüsusiyyətlərə sahib olacaq?
Samsung əvvəlki Galaxy M seriyasının smartfonlarını Qualcomm və MediaTek-in orta səviyyəli çipsetləri ilə təchiz edirdi. Məsələn, M51-də Snapdragon 730, M52-də Snapdragon 778G və M53-də daha zəif Dimensity 900 çipsetləri istifadə olunmuşdu. Lakin şirkət, M seriyasının yeni smartfonunda Qualcomm şirkətinin flaqman prosessoru olan Snapdragon 888 çipsetindən istifadə etməyi planlaşdırır. Həmçinin yeni smartfon 6,67 düymlük Super AMOLED ekran paneli ilə təchiz ediləcək. FHD+ təsvir ölçülü ekran paneli 90Hz görüntü yeniləmə tezliyinə malik olacaq.
Smartfonun arxasına nəzər yetirdikdə bizi 3 kamera bizi qarşılayacaq. Bunlara 64MP əsas , 8MP Geniş Bucaqlı və 5MP makro kamera daxildir. Ön tərəfdə isə çərtik daxilində selfi üçün nəzərdə tutulmuş 32 MP kamera yerləşir. Biz Galaxy M52 və Galaxy M51 modellərində də oxşar kamera quruluşunu görmüşdük. Smartfonun 6000 mAs batareya ilə təchiz ediləcəyi və 25 Vt sürətli enerji doldurma xüsusiyyətinə sahib olacağı gözlənilir. Smartfon 8 GB operativ yaddaşa və 128 GB daxili yaddaşa sahib olacaq. Lakin 256 GB daxili yaddaş seçimi də mövcud ola bilər.
Galaxy M54 modelinin satış qiymətinin 410-420 avro olacağı təxmin edilir. Mənbə bildirir ki, smartfon 2022-ci ilin sonu və ya 2023-cü ilin əvvəllərində satışa çıxarılacaq. Əgər Galaxy M54 həqiqətən Snapdragon 888 çipseti ilə gələrsə o, indiyə qədər buraxılmış ən yaxşı orta səviyyəli Samsung Galaxy smartfonlarından biri ola bilər. Galaxy M53 modeli Galaxy M52 ilə müqayisədə daha zəif olmuşdu. Lakin Galaxy M54 bu problemi ortadan götürəcək. Galaxy M52 modelinin ölkəmizdə mövcud olduğunu nəzərə alsaq, ümid edirik Galaxy M54 bu texniki xüsusiyyətlərə sahib olar və ölkəmizə idxal edilər. Eyni zamanda bu model Galaxy A74 modelinin də ekvivalenti ola bilər. Amma Galaxy A74 və Galaxy M54 bağlılığı barədə məlumat yoxdur. Daha dəqiq məlumat qarşıdakı həftələrdə ortaya çıxacaq.
