Bu ilin birinci yarısı Dimensity 9000 çipseti müəyyən qədər Snapdragon 8 Gen 1 çipsetinin qarşısına keçməyi bacarmışdı. Snapdragon 8+ Gen 1 çıxdıqdan sonra isə bütün rekordları alt-üst edərək liderliyi hər tərəfli ələ aldı. İndi isə noyabr ayı təqdim ediləcəyi gözlənilən Snapdragon 8 Gen 2 platformasının çıxarılmasına çox yaxınlaşmışıq. Bütün diqqətlərin Snapdragon 8 Gen 2 çipsetinə yönəldiyi vaxtda fərqli bir iddia ortaya atılıb. Çinin Weibo sosial şəbəkəsi üzərindən müxtəlif yeniliklər paylaşmaqla Digital Chat Station ləqəbli insayder Snapdragon 8 Gen 2 çipsetindən əlavə fərqli bir yüksək performanslı çipsetin hazırlıq mərhələsində olduğunu bildirir. Hansı ki, indiyə qədər təqdim edilmiş mobil çipsetlər arasında 3.5GHz tezliyini ilk dəfə görəcəyimiz naməlum Qualcomm çipsetindən söhbət gedir.
Snapdragon 8 Gen 2 seriyasına aid olacağı ehtimal edilən çipset üçün iddialı performans hədəflənir
Bildiyimiz kimi Snapdragon 8 Gen 2 çipsetindən yüksək performans nüvəsi olaraq Cortex-X3 istifadə ediləcək. Standart halda Snapdragon 8 Gen 2 çipsetində böyük bir ehtimalla bu nüvə 3.0GHz tezliyə sazlanacaq. Lakin iddialara görə Qualcomm şirkəti yeni seriyası ilə birlikdə bir mobil çipset üçün ən yüksək tezlik rekordunu yeniləməyi planlaşdırır. Xüsusilə oyun smartfonları üçün nəzərdə tutulacağı gözlənilən Snapdragon 8 Gen 2 Ultra şərti adına sahib çipset bu tezliyi ilə ciddi soyutma texnologiyaları tələb edəcək. Digər çipsetlər arasından Snapdragon 8+ Gen 1 və ya Dimensity 9000+ hal-hazırda 3.2GHz tezliyə çatdığından, Snapdragon 8 Gen 2 seriyasında 3.4–3.5GHz tezliyinə yüksəltmə etmək əslində, o qədər də çətin olmamalıdır.
Bəlkə də bu çipset elə Snapdragon 8+ Gen 2 olacaq. Lakin bu qədər yüksək tezliyin termal problemlər yarada biləcəyi ehtimalı mövcuddur. Ona görə bəzi mənbələr Snapdragon 8 Gen 2 Ultra olaraq üçüncü bir variantın hazırlanmasına daha çox inanırlar. Xatırlatma üçün qeyd edək ki, Snapdragon 8 Gen 2 standart olaraq 1 x Makalu-Elp + 2 x Makalu + 2 x Matterhon + 3 x Klein R1 kod adlı nüvələrə malikdir. Uyğun olaraq 1 ədəd Cortex-X3, 2 ədəd Cortex-A720, 2 ədəd Cortex-A710, 3 ədəd Cortex-A510 nüvələrindən söhbət gedir. Qualcomm şirkəti TSMC əsaslı 4nm istehsal prosesini istifadə etməyə davam edəcək. 3.5GHz tezliyinə çatmaqda şirkətin əsas hədəfi isə rəqib mobil çipsetlər arasında liderliyə yüksəlmək istəyidir. İddialara görə əsas hədəf Apple A16 Bionic ola bilər.
