Qualcomm şirkətinin yeni flaqman çipseti olacaq Snapdragon 8 gen 3 smartfon bazarında qiymətlərin artmasına səbəb ola bilər. Belə ki, gələn il təqdim ediləcək bir çox flaqman cihazın yeni 8 Gen 3 çipsetindən istifadə edəcəyi şübhəsizdir. Performans cəhətdən çipset güclü olsa da, qiymət tərəfində cib yandıracaq. Ümumiyyətlə hər il Qualcomm şirkəti çipsetlərini daha performanslı edir və bir çox funksiya əlavə edərək təkmilləşdirir. Görünən odur ki, şirkət bu dəfə bir çox yenilənmə edib və büdcəni nəzərə almayıb.
Bir çox analitik iddia edir ki, yeni Snapdragon 8 gen 3 çipseti gözləniləndən baha olacaq və bu da smartfon qiymətlərini artıracaq. Hətta bu qiymət artımı səbəbindən bir çox texnologiya nəhəngi bu il bazara çıxan Snapdragon 8 gen 2 dən istifadə edə bilər. Təbii ki, daha bir seçim məhz MediaTek şirkətinin Dimenstiy çipsetlərindən istifadə etmək ola bilər. Xatırladaq ki, ötən aylarda Snapdragon 8 Gen 3 ilə rəqabət aparacaq yeni Dimensity 9300 çipsetinin hazırlanacağı barədə xəbər vermişdik.
Əzəldən bəri Snapdragon və Dimensity çipsetləri bir-biri ilə rəqabət aparsa da, bu dəfə vəziyyət daha fərqli olacaq. Çünki MediaTek yeni flaqman çipseti ilə Snapdragon 8 Gen 3 çipsetini ötməyi planlayır. Əgər bu reallaşarsa gələn il bir çox texnologiya nəhəngi daha sərfəli olduğu üçün Dimensity 9300 çipsetindən istifadə edəcək. Ümumi olaraq deyə bilərik ki, gələn il və bu ilin sonu bazara çıxarılacaq smartfon modelləri daha baha təklif olunacaq. Hətta biz buna gələn ay təqdim ediləcək iPhone 15 Pro seriyasında şahid olacağıq.
