POCO brendinin büdcəvi yeni modelləri olacaq M5 seriyası 5 Sentyabr tarixində rəsmi olaraq təqdim ediləcək. Lakin ötən gün POCO M5 və POCO M5s modellərinin texniki göstəriciləri və qiymət barədə ilkin məlumatlar 91mobiles tərəfindən sızdırılıb. Həmçinin cihazların necə görünəcəyi də məlum olub. Gəlin bu modellər istinadən, növbəti aylar tez-tez görəcəyimiz Helio G99 çipseti barədə məlumat sahibi olaq.
Büdcəvi M5 modeli 6nm TSMC əsaslı Helio G99 çipseti ilə gəlir!
İlkin məlumatlara görə POCO M5 modeli MediaTek şirkətinin yeni nəsil Helio G99 çipseti ilə təchiz ediləcək. Helio G99 çipseti barədə çoxlarınız məlumatlı olmadığından gəlin sizə ilk olaraq qısaca bu çipset barədə bəhs edək. Yeni Helio G99 çipseti seriyanın ilk 6nm TSMC əsaslı çipseti hesab edilir. Bu vaxta qədər Helio seriyasında olduqca köhnəlmiş 12nm FFC (TSMC) istehsal prosesi istifadə olunurdu.
Helio G96 ilə müqayisədə CPU və GPU arxitekturasında heç bir dəyişiklik yoxdur. Lakin 2 ədəd Cortex-A76 nüvəsinin tezliyi 2.05GHz-dən, 2.2GHz tezliyə çıxarılıb. Nəticədə Helio G96 çipsetindən xeyli yüksək performansa və aşağı enerji sərfiyyatına malikdir. Performansı təqribən Snapdragon 695 və Dimensity 810 səviyyələrindədir. Əgər Mali-G57 MC2 qrafik çipi yerinə, daha güclü Mali-G76 MC4 istifadə olunsaydı, 4G bağlantısını dəstəkləyən bu çipset digər 2 çipsetdən xeyli güclü olardı. Heyif ki, Helio G96 ilə eyni qrafik çipi işlədilib və performansın daha da artmasına imkan verilməyib. Giriş səviyyəsi modellər üçün nəzərdə tutulan bir çipset üçün isə yenə də yetəri qədər güclü və rəqabətcildir. Qarşıdakı aylarda bir çox modeldə bu çipsetin işlədildiyi ilə qarşılaşacağıq. İnfinix Note 12 Pro modeli nəzərən AnTuTu testlərində ~380.000 xal toplayır.
POCO M5 modelinə qayıtsaq 6,58 düymlük FHD+ təsvir ölçülü IPS LCD ekran ilə təmin olunacaq. Görüntü yeniləmə tezliyi 90Hz təşkil edəcək. Batareya həcmi 5000 mAs olub, 33 Vt sürətli şarj dəstəkləyəcək. Barmaq izi skaneri yan hissədə quraşdırılacaq və Android 12 əsasında MIUI 13 interfeysi ilə işləyəcək. Smartfon təqribi 190$ başlanğıc qiyməti ilə təklif ediləcək.
POCO brendinin M5s modeli isə yenə təkrar brendləşdirmə məhsuludur
POCO brendinin M5s modeli adı dəyişdirilmiş Redmi Note 10S modeli olacaq. Buna uyğun olaraq cihaz 6,43 düymlük AMOLED ekran ilə təmin olunacaq. Smartfon MediaTek Helio G96 çipseti ilə çalşacaq və üçlü əsas kamera modulu alacaq. Smartfonun yerdə qalan bütün xüsusiyyətləri əlaqəli Redmi Note 10S ilə tamamilə eynidir.
