İyun ayı Avropa birliyi tərəfindən smartfonlar üçün yeni qanun layihəsi qəbul edildi. Həmin qanun çərçivəsində 2024-cü ilin payız ayına qədər istehsalçılar öz cihazlarına Type-C girişi quraşdırmağa məcbur ediləcəkdi. Göründüyü qədərilə Avropa Birliyinin smartfon istehsalçıları üçün tələbləri bununla bitməyəcək. Bir cihaz nə qədər uzunömürlüdürsə yeni məhsullara yaranan tələb bir o qədər gec formalaşa bilir. Verilən məlumata görə Avropa birliyi smartfonlar və planşetlər üçün uzunömürlülüyü artıran, istehsalçıların isə prinsiplərinə uyğun gəlməyən yeni tələblər hazırlayır.
Avropa Birliyi 5 illik komponent dəstəyi və ya təqribi 1000 şarj dövrünə dayanıqlı batareya tələb edə bilər
Yeni təklifə görə smartfon istehsalçıları smartfonun satışa çıxarılmasından sonrakı 5 il ərzində vacib hesab edilən minimum 15 fərqli komponenti (ehtiyat hissəsini) tədarük etməli olacaqlar. Alıcılar 5 il ərzində asanlıqla batareya, ekran, adapter, arxa qapaq, hətta SIM yuvasına qədər komponentləri rahatlıqla əldə edəcəklər. Avropa Birliyi smartfonlar üçün bu qərarı xüsusilə karbon ayaq izinin azalması məqsədilə atır. Əgər istehsalçı 5 ilə qədər batareya tədarük edə bilməsə, 1000 tam şarj dövrünə qədər həcminin 20 faizini itirməyən batareya hazırlamalı olacaq. Eyni zamanda təyin ediləcək müddət ərzində əməliyyat sistemi yeniləmələrinin axsadılmaması və yeniləmələrin batareya ömrünə hansısa bir müdaxilə yaratmaması da zəruri məcburiyyətə çevriləcək. Hal-hazırda smartfonlar əsasən 500 şarj dövrünə dayanıqlıdırlar.
Smartfonlar və planşetlərlə bağlı Avropa Birliyi təkcə bu qanun təklifləri ilə kifayətlənmir. Bu ilin sonlarına doğru qəbul ediləcəyi təqdirdə smartfon və planşetlərə “enerji etiketləri” veriləcək. Bu etiketlər soyuducu, paltaryuyan kimi məişət əşyalarına bənzər olacaq. Smartfonun batareya davamlılığı, su və toz dayanıqlılığı, zərbələrə qarşı nə qədər dözümlü olduğu və.s ilə uyğun etiketlər cihazlara (qutularına və.s) yapışdırılacaq.
Təkliflərin hansı formada inkişaf edəcəyi, qəbul edilib-edilməyəcəyi tam dəqiq deyil. Lakin son bir neçə aydır ki, Avropa Birliyi smartfonlar, texnoloji avadanlıqlar ilə ciddi maraqlanır. Ona görə də qarşıdakı 1 il və ya daha qısa müddət ərzində təkliflərin qəbul edilməsi bizi təəccübləndirməyəcək. Hətta bəzi Çinli istehsalçıların yeni cihazlarında 1000-1600 şarj dövrünə dayanıqlılıq iddiaları ola bilsin indidən bu prosesə hazırlıq hesab edilə bilər.
