İnsan övladının ekologiyaya vurduğu ziyan günbəgün artdıqca bu problemin həlli üçün maraqlı qanunlar qəbul edir. Lakin qəbul edilmiş qanunlardan bəziləri, ekoloji problemlərin düzəlməsindən əlavə başqa müsbət təsirlərə də malik olur. Məsələn, uzun müddətdir Avropa Birliyinin təsdiqləməsi gözlənilən yeni bir qanun var. Hansı ki, texnoloji cihazların vahid bir standart kimi Type-C girişi ilə təmin olunmasından söhbət gedir. Nəhayət, Avropa Birliyi bununla bağlı yekun qərarı verib. Type-C girişinin məcburi şəkildə cihazlara quraşdırılacağı tarix barədə də məlumat artıq açıqlanıb. Gəlin yeniliklər nədən ibarətdir, hansı cihazlara bu qərar təsir edəcək hamısına nəzər salaq.
Avropa birliyinin Type-C girişini ləğv etməsi hansı proseslərdən keçəcək?
Qəbul edilən yeni qərarla birlikdə, istehsalçıların hamısı məcburi formada hazırladığı texnoloji avadanlıqlara Type-C girişi quraşdırmaq məcburiyyətindədir. İstehsalçıların buna adaptasiya olmaq üçün 2024-cü ilin payızına qədər vaxtları var. 2024-cü ilin təqribi sentyabr ayına qədər smartfonlar, kompüterlər, qulaqlıqlar, kameralar, planşetlər, oyun konsolları, səs ucaldanlar və ağlınıza gələ biləcək bu tip cihazların Type-C yuvasına sahib olması məcburi olacaq.
Ağıllı saatlar kimi zərif cihazlar isə bu məcburiyyətdən təsirlənməyə bilər. Çünki, Type-C yuvasının quraşdırılması ölçüsünə görə mümkün deyil. Bu mövzu ilə bağlı ən çox narahat olan şirkətin isə Apple olacağını təxmin etmək o qədər də çətin deyil. İllərdir belə məhududiyyətlərin inkişafa pis təsir edəcəyini deyən şirkət hələ də iPhone modellərini Lightning girişiylə təchiz edir.
Son günlərin ən gündəmdə olan şirkətlərindən biri olan Apple da bundan sonra iPhone modellərini Type-C girişinə keçirəcək və ya fiziki yuvanı tamamilə ləğv edəcək. Maksimum iPhone 16 seriyasına qədər bu keçid baş tutmalıdır. Əks halda iPhone modelləri Avropa bazarında satış üçün uyğun hesab edilməyə bilər.
23 sentyabr 2021-ci ildə Avropa Parlamentinə çıxarılmış bu təklif o vaxtdan bəri müzakirə edilirdi. Qərar çərçivəsində, yay tətilindən sonra parlament və şura sazişi rəsmi şəkildə təsdiq edəcək. Avropa birliyi rəsmi proqramında bunu dərc etdikdən 20 gün sonra qaydalar qüvvəyə minəcək. Qərarın müddəaları 24 aydan sonra tətbiq olunmağa başlayacaq. İstehsalçıların isə məhz buna görə 2024-cü ilin payızına qədər vaxtları var. O vaxta qədər çıxarılmış məhsullarda təbii ki, heç bir məhdudiyyət olmayacaq.
