Smartfon bazarındakı çeşidli markalar dayanmadan bir-birindən rəqabətcil modellər ortaya qoyur. Nəticədə “zəif” və rəqabətlə ayaqlaşa bilməyən brendlər sürətlə azalan satış ədədlərinə görə dəyər itirməyə başlayırlar. Təəssüf ki, bir vaxtlar bazara liderlik edən Nokia brendi də hal-hazırda məhz “zəiflər” sırasına düşməklə üzləşib. Smartfonların olmadığı zamanlarda düyməli telefonları ilə güclənən şirkət, smartfonlara keçid prosesində bu sektordan da müəyyən qədər uzaqlaşmışdı. İndi isə, vəziyyət şirkət adına çox acınacaqlıdır. Xatırlayırsınızsa bu yaxınlarda Xiaomi firmasının sensor ekranlı, Android əməliyyat sistemli düyməli telefonu barədə xəbər hazırlamışdıq. Həmin cihaz əslində düyməli telefonların necə innovativləşdirilə biləcəyini bizə göstərmişdi. Nokia şirkəti də bənzər bir strategiya ilə “Necə diqqət çəkə bilərik?” deyərək Nokia 5710 modelini hazırlayıb.
Nokia 5710 modelinin qulaqlığı smartfonlarla da işləyə bilir
Bu gün düyməli smartfon almaq üçün müəyyən bir səbəb olmalıdır. Əgər sadəcə danışıq məqsədi ilə telefon lazımdırsa onda sizə ən ucuz qiymətə ala biləcəyiniz köhnə bir telefon da kifayət edəcəkdir. Yəni, gedib nisbətən baha qiymətə düyməli telefon almaq istəməyəcəksiniz. Lakin istehsalçı yeni düyməli telefonda diqqət çəkən bir yenilik təklif etsə, bəlkə fikrinizi dəyişə bilərsiniz. Nokia 5710 modeli də bu dediklərimiz düşünülərək hazırlanıb.
Nokia firması sadə bir telefon yerinə Nokia 5710 XpressAudio adını verdiyi cihazı “musiqi alətinə” çevirmək üçün bəzəyib. Telefonun kiçik ekranının sağ və sol tərəflərinə xüsusi səs düymələri əlavə edilib. Ən əsası isə arxa tərəfə blutuz ilə işləyən qulaqlıqlar qoyulub. Beləliklə, siz bu telefonu alaraq həm də naqilsiz qulaqlıq almış olursunuz.
Qulaqlıqları çıxararaq öz smartfonunuzla da istifadə edə bilərsiniz. Lakin 32GB-a qədər artırıla bilən xarici yaddaş kartı hesabına istədiyiniz qədər musiqini elə Nokia 5710 üzərindən də dinləmək mümkündür. Bluetooth 5.0 texnologiyası dəstəkləndiyindən bağlantı sürəti yüksəkdir.
Telefon 2.4 düymlük kiçik bir ekrana malikdir. Arxa tərəfində isə 0,3MP kamera yerləşir. Əməliyyat sistemi Android deyil. Daxili yaddaşı 128MB təşkil edir. 1450 mAs batareyaya sahibdir. Qeyd edək ki, naqilsiz FM-Radio xüsusiyyətini də dəstəkləyir. Telefonun qiymətinə gəldikdə dəqiq rəqəmlər açıqlanmasa da, 90$ olacağı bildirilir.
