Xiaomi firması uzun bir müddətdir kiçilməyə doğru gedən düyməli telefon bazarını yenidən alovlandırmaq istəyir. Çin mənşəli qaynaqların verdiyi məlumata görə Xiaomi firmasının Duoqin alt brendi düyməli telefonların yeni nəslini hazırlayır. Lakin hazırlanan bu düyməli telefon normal bir smartfondan elə də fərqlənmir. Çünki, Xiaomi firması yaxın vaxtlarda təqdim edəcəyi Duoqin F22 Pro modelində smartfonlara xas komponenetlər işlədib. Elə isə gəlin Duqoin F22 Pro modelinin xüsusiyyətlərinə daha yaxından nəzər salaq.
Duoqin F22 Pro sensor ekrana və Helio G85 çipsetinə sahib olacaq
Xiaomi firması bu modelə Redmi Note 9, Note 8 (2021) kimi modellərdə istifadə etdiyi Mediatek Helio G85 çipsetini quraşdıracaq. Belə bir telefonda, bu qədər güclü bir çipsetin nəyə yarayacağını bilməsək də, dünyanın ən sürətli düyməli telefonu olacağı dəqiqdir.
Düymələrin mövcud olmasına baxmayaraq Duoqin F22 Pro modelini idarə etmək üçün sensor ekrandan da istifadə edə biləcəksiniz. Duoqin brendi smartfona 3.5 düymlük 60Hz IPS LCD ekran paneli quraşdırıb. 640P təsvir ölçülü ekran paneli, kiçik bir cihazda yetəri qədər yaxşı görüntü keyfiyyəti təmin edəcək. Arxa tərəfdə bir ədəd 8MP əsas kameraya, düymələrin yanında sağ aşağı hissəyə isə 2MP selfi kamerası yerləşdirilib.
2150 mAs batareyası 10 Vt sürətli doldurma dəstəkləyəcək. Android 12 əməliyyat sistemi üzərinə fərqli bir interfeys istifadə edəcək. MIUI interfeysinə sahib olmayacaq. Çünki, sensordan əlavə düymə ilə də işləməsi üçün xüsusi interfeys yaradılmalıdır.
Çəkisi 116 qram olub, qalınlığı 9 mm təşkil edəcək. Hətta infraqırmızı ötürücü ilə pult kimi işlətmək də mümkün olacaq. Onu deyə bilərik ki, Xiaomi firmasının düyməli telefonu bu potensialı ilə bir çox insanın diqqətini çəkməyi bacaracaq. Hal-hazırda Android smartfonunuzda işlətdiyiniz tətbiqləri Duoqin F22 Pro modelində də işlədə biləcəyinizi düşündükdə müəyyən tələblərə görə düyməli telefon axtaranlar bu modeldən yana seçim edə biləcəklər.
4/128GB yaddaş variantında satışa çıxarılması planlaşdırılan modelin təqdimat tarixi və qiyməti hələlik naməlumdur. Siz bu model barədə nə düşünürsünüz? Sizcə Xiaomi yeni modelində uğurlu ola biləcək?
