MediaTek şirkətinin Dimensity portfelindəki ən yeni flaqman mobil prosessor olan Dimensity 9300+ rəsmi olaraq təqdim edilib. Qeyd edək ki, yeni mobil çipset olduqca təkmilləşmiş süni intellekt və performans təcrübəsinə sahibdir. Yeni çipset hazırda bir çox smartfon istehsalçısının əsas diqqət mərkəzinə daxil olub.
Beləliklə, MediaTek brendi yeni flaqman Dimensity 9300+ çipsetini təqdim edib. Yeni flaqman çipset daha yüksək saat sürəti təklif edir və dil modelləri üçün daha böyük dəstək gətirir. Bundan əlavə, yeni çipset Dimensity 9300 ilə müqayisədə bəzi performans təkmilləşdirmələri təklif edərək cihazda generativ süni intellekt emalını sürətləndirir. Əslində yeni çipset sələfindən elə də böyük fərqə sahib deyil. Ən böyük təkmilləşdirmələr cihaz daxili süni intellekt emalına və böyük dil modelləri üçün daha geniş dəstəyə sahib olmasıdır. Çipset, Google-ın Gemini Nano, Meta-nın Llama 2 və 3 modelləri daxil olmaqla 01.AI Yi-Nano, Alibaba Cloud Qwen LLM, Baichuan AI və ERNIE-3.5-SE dil modellərini dəstəkləyir.
MediaTek APU 790 generativ süni intellekt mühərriki, cihazd daxili LoRA Fusion və NeuroPilot LoRA Fusion 2.0 dəstəyi ilə şirkət, məhsuldar süni intellekt tətbiqləri ekosistemində platforma kimi güclü mövqe tutur. NeuroPilot Speculative Decode Acceleration texnologiyası sayəsində süni intellekt emal xüsusiyyəti qazanan Dimensity 9300+, 33B parametrli LLM-ləri səmərəli şəkildə işlədə bilir. MediaTek bildirir ki, NeuroPilot Speculative Decode Acceleration sayəsində Dimensity 9300+ saniyədə 22 tokenlə 7B parametrli LLM-ləri işlədə bilir.
Bundan əlavə, üçüncü nəsil TSMC 4nm prosesi ilə All-Big-Core dizaynından istifadə edən Dimensity 9300+, 3,4 GHz-ə qədər işləyən Arm Cortex-X4 nüvəsinə, həmçinin üç Cortex-X4 nüvəsinə və dörd Cortex-A720 nüvəsinə malikdir. Qeyd edək ki, Vivo X100S Dimensity 9300+ istifadə edən ilk cihaz olacaq. Bundan əlavə, bu ay buraxılması planlaşdırılan iQOO Neo9S Pro da yeni çipsetlə təchiz ediləcək.
