Dayanıqlı smartfonları ilə məşhurlaşan Oukitel şirkəti Ces 2025 sərgisində təqdim etdiyi 33 min mAh batareya həcmli və quraşdırılmış proyektoru olan WP100 Titan adlı smartfonu satışa çıxarır. Düşərgəçilər və təbiət idmanı ilə maraqlananlar üçün hazırlanmış WP100 Titan, smartfondan daha çox powerbank kimi fəaliyyət göstərən çoxməqsədli bir cihazdır.
Ümumiyyətlə, smartfon gözlənildiyi kimi, çox qalın və ağırdır. Çəkisi 860 qram, qalınlığı ı 3,3 sm olan cihaz 6 aya qədər gözləmə müddəti, 289 saata qədər danışma, 49 saata qədər video izləmə imkanı ilə uzunmüddətli istifadəçi təcrübəsi təklif edir. MediaTek Dimensity 7300 çipseti ilə təchiz edilmiş WP100 Titan 16 GB RAM və 512 GB yaddaşa malikdir. Smartfonun ekranı isə 6.8 düymlükdür və 120 Hz yenilənmə tezliyini dəstəkləyir.
Qeyd edək ki, smartfonun arxa hissəsində 150 saata qədər davam edə bilən güclü 1200 lümen LED kamp işığı var. Üst tərəfdə 100 lümen gücü olan daxili proyektor var. Şirkət bildirir ki, bu proyektorla 6 filmə baxmaq olar. IP68 suya və toza davamlılıq dərəcəsinə malik olan cihazın 200 MP əsas kamera, 20 MP infraqırmızı gecə görmə kamerası və arxa tərəfində 2 MP makro kamera, ön tərəfdə isə 32 MP selfi kamerası var. İlk dəfə CES 2025-də elan edilən Oukitel WP100 Titan, Kickstarter kampaniyasında 10.000 dollarlıq maliyyələşdirmə hədəfini aşaraq, mart ayında istehsala çıxarılır və aprel ayından etibarən də satışa çıxarılır. Qeyd edək ki, smartfonu indidən sifariş etmək istəyənlər 599 dollar ödəyəcək. Bununla belə, smartfonun satışa çıxarıldıqda ilkin qiyməti 899 dollar olacaq.
