Süni intellekt daha bir neçə rəqibi bir araya gətirdi. Belə ki, MediaTek və Qualcomm cihazdaxili süni intellekt dəstəyi təmin edə bilmək üçün Meta ilə əməkdaşlıq edəcək. Gələn ildən etibarən MediaTek ilə işləyən bütün flaqman smartfonlar cihazdaxili süni intellekt dəstəyinə sahib olacaq. Hətta bunun üçün şirkət Meta-nın Llama 2 dil modelindən istifadə edəcək. Ümumiyyətlə son dövrlərdə bir çox texnologiya nəhəngi Metanın Llama 2 dil modeli ilə bağlı əməkdaşlıq edir. Bunlardan biri də MediaTek şirkəti oldu.
Meta, Qualcomm və MediaTek şirkətləri Llama 2 dil modelinə görə süni intellekt sahəsində əməkdaşlıq edəcəklər. Qeyd edək ki, MediaTek yeni nəsil flaqman çipsetlərinin süni intellekt dəstəyinin təkmilləşdiriləcəyini açıqlayıb. Hətta yeni çipsetlər təchiz ediləcək ilk smartfonlar ilin sonunadək bazara çıxacaq. Süni intellekt dəstəyi təkmilləşdiriləcək ilk çipset isə məhz Dimensity 9300 olacaq. Qeyd edək ki, Llama 2 dil modeli, OpenAI şirkətinin GPT, Google şirkətinin isə PaLM 2 modellərinə alternativdir.
MediaTek və Qualcomm şirkətləri Llama 2 modelinin daha münasib və əlverişli olduğunu düşündükləri üçün Meta ilə əməkdaşlıq etməyə başlayıblar. Yeni dil modeli çipsetlərin daha məhsuldar işləməsinə və daha təhlükəsiz olmasına imkan yaradacaq. Bundan əlavə cihazdaxili süni intellekt dəstəyinin bir neçə üstünlüyü mövcuddur. Onlardan biri də məlumatların məxfiliyinin qorunmasıdır. Yəni sizin məlumatlarınız buluda göndərilmir. Bu da yeni çipsetlərlə təchiz ediləcək smartfonların süni intellekt ilə daha təhlükəsiz işləyə biləcəyindən xəbər verir.
