Daima istifadəçiləri təhlükəsizliyi ilə bağlı atdığı addımlar ilə gündəmdə olan Google bu dəfə bizləri məyus edir. Belə ki, aparılan araşdırmalara görə Google öz maraqlarını təmin etmək üçün axtarış nəticələrinə müdaxilə edir. İnternetdə ədaləti təmin etmək üçün hazırladığını iddia etdiyi qaydaları pozanları dözülməz şəkildə cəzalandıran Google, öz maraqlarına gəldikdə isə heç kimi dinləmir. Ümumiyyətlə Google hər zaman istifadəçi təhlükəsizliyinə üstünlük verdiyini iddia etsə də, yavaş-yavaş məlum olur ki, əslində bağlı qapılar arxasında maraqlar ön plandadır və bunu təmin etmək üçün hər vasitəyə icazə verilir.
ABŞ ədliyyə nazirliyi tərəfindən aparılan araşdırmalar çərçivəsində inhisarçılıq iddiaları ilə bağlı müxtəlif məlumat və sənədlər toplanıb. İstintaq faylından sızan e-poçt, Google-un öz qaydalarını amansızcasına poza biləcəyini aşkar edib. Belə ki, Google Ads departamentinin vitse-prezidenti Jerry Dischler tərəfindən axtarış, reklam və Chrome komandalarına cavabdeh olan Prabhakar Raghavan-a göndərilən e-poçtda şirkətin gəlir hədəflərinə çatması üçün görülməli olan təcili işlər sadalanır. Anlamaq olduqca çətin olan e-poçt məzmununda Dischler təcili olaraq axtarış nəticələrinə bəzi müdaxilələrin edilməsini tələb edir. Google axtarış sisteminə edilən bu müdaxilə isə şirkətin maraqlarını təmin etmək üçündür.
Dischler bildirir ki, komandalar gəlir gözləntilərini qarşıladığı üçün bonuslar azalmayacaq, çünki işçilər kirayə haqqı yüksək olan yerlərdə yaşayır və bu, mənəviyyata mənfi təsir göstərə bilər. Dischler, hal-hazırda standart bir insandan daha çox gəlir haqqında düşündüyünü bildirsə də, bunun gəlirə bağlılıq kimi qəbul edilməməsi lazım olduğunu və bunu bütün Google-un xeyrinə istədiyini vurğulayır. Minlərlə tətbiqi silən, saytların reytinqini manipulyasiya edən, qaydaları bəhanə edərək YouTube kanallarını bağlayan Google, qərar verərkən bu qaydaları pozmaqdan çəkinmir.
