Ötən aylarda təntənəli sürətdə bizlərə təqdim edilən lakin qiymət baxımından hər kəs üçün əlverişli olmayan Apple Vision Pro modeli artıq unudulur. Belə ki, yeni nəsil qarışıq reallıq eynəyinə olan maraq gün keçdikcə azalır. Cihaz ilk günlərdə təqdim edildikdə olduqca böyük səs-küyə səbəb olsa da, sonradan istehlakçılar arasında bir çox problemlərə yol açmışdı. Hətta Apple Vision Pro modelini əldə edənlər çox keçmədən şikayətlərlə birlikdə cihazı Apple-a geri qaytarırdı.
Xatırladaq ki, Apple şirkəti ötən ilin WWDC 2023 tədbiri çərçivəsində ilk qarışıq reallıq eynəyi Vision Pro-nu elan etmişdi. Məhz həmin gündən başlayaraq isə Apple həvəskarları şirkətin yeni VR eynəyini gözləyirdilər. Bu ilin fevralında isə uzun müddətdir gözlənilən cihaz ABŞ-da satışa çıxarıldı. Apple cihazı mağazalarda insanların sınaqdan keçirməsinə icazə verdiyi üçün məhz bir çox şikayətlər elə mağazada sınaq edilərkən başlanmışdı. Qeyd edək ki, Apple yeni Vision Pro eynəyini 3500 dollarlıq çox inanılmaz qiymətlə satışa çıxarmışdı. Vision Pro ilk dəfə bazara çıxarkən ciddi maraq görsə də, indiki xəbərlərə görə istehlakçı marağı əhəmiyyətli dərəcədə azalır.
Beləliklə, satışa çıxarıldığı ilk günlərdə böyük maraqla qarşılanan, lakin daha sonra bir çox şikayətlərin mənbəyinə çevrilən Apple Vision Pro artıq unudulur. Bloomberg-dən Mark Gurman, ABŞ-dakı Apple Store mağazalarında Vision Pro-ya marağın nəzərəçarpacaq dərəcədə azaldığını deyir. Gurman danışdığı Apple Mağazalarına əsaslanaraq pərakəndə satış demosunun və satış tələbinin əhəmiyyətli dərəcədə azaldığını vurğulayır. Hətta son həftələrdə məhsul satışı sadəcə həftədə bir neçə ədədə qədər azalıb.
