Son dövrlərdə Apple şirkəti, Çində smartfon bazarında Huawei ilə şiddətli rəqabətdə uduzan tərəfdədir. Məhz bu vəziyyəti dəyişmək və Huawei ilə rəqabət apara bilmək üçün Apple Çində qiymətləri kökündən azaldıb. Beləliklə, Apple, dünyanın ən böyük smartfon bazarında durğun satışları artırmaq üçün Çindəki onlayn pərakəndə satış platformalarında qiymətləri aqressiv şəkildə endirib. Hazırda endirim məbləği 20%-i ötür.
![Apple Çində qiymətləri](https://tedroid.com/media/2024/05/apple-huawei-reqabet-cinde-qiymetleri.webp)
Huawei şirkəti ilə rəqabət apara bilmək üçün Apple şirkəti Çində qiymətləri 100-200 dollar aşağı salıb. Qeyd edək ki, iPhone 15 Pro Max modeli Apple-ın rəsmi internet mağazalarında JD.com və Tmall platformalarında 7949 yuan (1100 dollar) qiymətinə satılmağa başlayıb. Bu model sentyabr ayında satışa çıxarılarkən bazara 9999 yuan qiymət etiketi ilə daxil olmuşdu. Smartfon nə az, nə çox 20% endirim əldə edib. Daha ucuz olan 128 GB-lıq iPhone 15 modeli 4599 yuana (635 dollar) təklif olunur. Bu modelə isə 23% endirim tətbiq olunub. Hər iki onlayn platformada endirimlər mayın 28-dək davam edəcək.
Apple ötən fevral ayında növbəti endirim kampaniyasına başlamışdı. Lakin cari kampaniya çərçivəsində endirimlər iki dəfə artırılıb. . Çin İnformasiya və Kommunikasiya Texnologiyaları Akademiyasının (CAICT) məlumatlarına görə, bu endirimlər Apple şirkətinin işinə yarayır. Keçən fevral ayında edilən endirimlər satışların 12% yaxşılaşması ilə nəticələnmişdi. Bununla belə, Apple-ın Çində satışlarının ilin ilk iki ayında 37 faiz azaldığını da qeyd etməliyik. İlin birinci rübündə Apple-ın Çindən əldə etdiyi gəlirlər də 8% azalıb. Counterpoint bazar analiz firmasının məlumatına görə, ilin birinci rübündə Apple əvvəlki ildə lider olduğu halda, indi üçüncü yerə düşüb.