TCL brendi, Society for Information Display 2024 sərgisində dünyanın ilk funksional üçə qatlanan smartfonunu sərgiləyib. Qoşa menteşəyə sahib olan smartfon hər iki tərəfə qatlana bilir. Xatırladaq ki, şirkət ilk dəfə 2019-cu ildə oxşar prototip cihaz nümayiş etdirsə də, bu cihaz heç bir funksionallığa sahib deyildi.
![TCL üçə qatlanan](https://tedroid.com/media/2024/05/tcl-dunyanin-funksional-uce-qatlanan.webp)
Smartfon tam şəkildə açıldıqda 7.85 düymlük planşet ekran nisbətinə bənzər bir ekrana sahib olur. Qoşa menteşəli və hər iki tərəfi sərbəst qatlana bilən telefon həm “Z” şəklində, həm də “G” şəklində qatlana bilir. Qeyd edək ki, bundan əvvəl də bir çox brend özünun üçə qatlanan smartfon konseptlərini təqdim etmişdi. Daha əvvəl təqdim edilən üçə qatlanan smartfonların əvvəlki versiyaları həddindən artıq qalınlığa sahib olurdu. TCL isə bu problemi cəmi 427 mikron qalınlığında olan paneli ilə aradan qaldırıb. Telefon həmçinin Under Panel Sensor texnologiyası ilə 3D üz tanıma funksiyasını dəstəkləyir. LTPO tandem OLED texnologiyasından istifadə edərək ekran yeniləmə sürətini 1 Hz ilə 120 Hz arasında dəyişə bilər.
Hazırda üçə qatlana bilən bu smartfonun nə vaxt kütləvi istehsala keçəcəyi məlum deyil. Bundan əlavə, Huawei kimi nəhənglərin də oxşar cihazlar üzərində çalışdığı bildirilir. İddialara görə, Huawei bu ilin sonlarına doğru 10 düymlük ekrana sahib üçə qatlanan smartfon təqdim etməyi planlaşdırır.