Counterpoint Research-in son məlumatlarına görə, birinci rübdə Avropa smartfon bazarında yeganə geriləyən və ya uduzan Apple şirkətidir. Ümumilikdə isə, Avropada smartfon bazarı ötən ilin birinci rübü ilə müqayisədə 10% artıb. Burada maraqlısı odur ki, Apple digər texnologiya nəhənglərindən fərqli olaraq 1% geriləyib.
Qeyd edək ki, Samsung brendi 2024-cü ilin birinci rübündə 2023-cü ilin birinci rübü ilə müqayisədə 7 faiz, Honor 67 faiz, Realme 59 faiz, Xiaomi 11 faiz irəliləyib. Counterpoint Research-in məlumatına görə, Avropada sənayenin ilk rüb lideri Samsung olsa da, Realme-nin telefon satışlarında bir çox Avropa ölkəsində əhəmiyyətli artım müşahidə olunub. Daha əvvəl isə şirkətlərin uzunmüddətli satış hesabatları diqqət cəlb etmişdi.
Belə ki, Altindex tərəfindən burada paylaşılan bir hesaba görə, Cənubi Koreya mərkəzli texnologiya nəhəngi Samsung, son 10 ildə təxminən 3 milyard telefon satıb. Satışlar 2014-cü ilin birinci rübündən 2024-cü ilin birinci rübünə qədər hesablanıb. Samsung bu diapazonda ən böyük rəqibi Apple-dan 700 milyon çox telefon satmağı bacarıb. Ümumi satışları 2,2 milyard olan Apple ilə müqayisədə şirkət demək olar ki, hər büdcəyə uyğun onlarla telefona sahibdir. Altindex tərəfindən paylaşılan yuxarıdakı cədvəldə Çin nəhənglərindən biri olan Xiaomi’nin 10 ildə 1 milyard satışı keçdiyi, OPPO’nun 911 milyon, Vivo’nun isə 526 milyonda qaldığı görülür. ABŞ-ın embarqosuna görə telefon satışı əvvəlkindən xeyli yavaş olan Huawei-nin də 1 milyardı keçdiyi göstərilib. Əvvəllər iPhone 15 ailəsinin başında olan iPhone 15 Pro Max, birinci rübdə dünyanın ən çox satılan smartfonu idi.
