Karlsrue Texnologiya İnstitutunun (KIT) alimləri, ənənəvi şüşəyə alternativ yeni material hazırlamağı bacarıblar. Belə ki, bu yeni material da şüşə kimi şəffafdır və elektrik enerjisi ödənişlərinizi aşağı sala bilər. Ümumiyyətlə, evinizdə çoxlu şüşə səthlərin olması işıqlandırma üçün ideal olsa da, bu, həddindən artıq istiliyin daxil olmasına imkan verə bilər.
Lakin Karlsrue Texnologiya İnstitutunun (KIT) alimləri divar və damlarda şüşəni əvəz etmək potensialına malik, özünü təmizləyən və eyni zamanda şüşədən daha çox işığa qarşı şəffaf olan yeni metamaterial hazırlayıblar. Bu material həmçinin məxfilik problemlərini də həll edir. Şüşə komponentləri binanın gün ərzində aldığı təbii işığı artıra və eyni zamanda enerji istehlakını azalda bilər. Bununla belə, həddindən artıq şüşə istifadəsi həm göz yorğunluğuna, həm baş ağrılarına, həm də görmə qabiliyyətində bəzi problemlərin yaranmasına səbəb ola biləcək parıtlı meydana gətirir. Bu, xüsusilə həddindən artıq günəş işığı və ya parlaq işıqlandırma olan mühitlərdə işləyən insanlara mənfi təsir edə bilər.
Karlsrue Texnologiya İnstitutunun alimləri yeni inkişaf etdirdikləri və PMMM adlandırdıqları metamaterialın bütün bu məhdudiyyətləri aşa biləcəyini iddia edir. Komandanın fikrincə, PMMM normal şüşəyə yapışdırıla bilən nazik bir təbəqədir və qabaqcıl xüsusiyyətlərini onun səthindəki mikroskopik strukturlardan alır. Bu strukturlar şüşəyə gələn işığın 73 faizini səpərək, materiala buz kimi görünüş verir. Maraqlıdır ki, bu buzlu görünüş günəş işığına qarşı 95 faiz şəffaflıq təqdim edir. Qeyd edək ki, şəffaflıq faizi adi şüşələrdə 91%-dir. Bununla belə, PMMM günəş işığını, daha doğrusu onun istiliyini istixana effekti kimi, ənənəvi şüşələrə bənzər şəkildə içəridə tutmur. Testlərə görə, PMMM ətraf mühitin temperaturunu 6 dərəcə aşağı saxlaya bilir. Bu isə öz nəticəsində kondisioner istifadəsini azalda, yəni elektrik enerjisi xərclərinizi minimuma endirə bilər.
