ABŞ-ın biotexnologiya şirkəti Colossal Biosciences nəsli kəsilmiş yunlu mamontu geri qaytarmaq üçün əhəmiyyətli bir addım atıb. İlk baxışdan inanılmaz hesab olunsa da, alimlər yunli mamontları geri qaytarmaq üçün yeni siçan cinsi yaradıblar. Belə ki, genetik mühəndislik üsullarından istifadə edilərək inkişaf etdirilən “yunlu siçanlar” soyuğa davamlı xəz quruluşu ilə seçilir. İnkişaf, genetik cəhətdən dəyişdirilmiş Asiya fillərinin mamonta bənzər xüsusiyyətlərlə təchiz edilməsində əsas mərhələ kimi qiymətləndirilir.
Colossal qrupu, Mamontların və Asiya fillərinin genomlarını müqayisə edərək, soyuq iqlimlərə uyğunlaşmanı təmin edən genetik fərqləri müəyyən edib. Şirkətin həmtəsisçisi və baş direktoru Ben Lamm prosesin düzgünlüyünü sübut etmək üçün laboratoriya mühitində genetik modifikasiyalarla bağlı təcrübələr apardıqlarını bildirib. Prosesdə tədqiqatçılar siçanların dəri quruluşunu və yağ metabolizmasını dəyişdirmək üçün doqquz fərqli geni hədəfə alıblar. Gen redaktə üsullarından istifadə edərək, siçan embrionlarında dəyişikliklər edilib və bu embrionlar surroqat analara implantasiya edilib. Nəticədə doğulan siçanların bəzilərinin uzun, qıvrım saçları, qızılı qəhvəyi rəngi və daha sıx tükləri mövcud olub.
Bununla belə, geni dəyişdirilmiş siçanların əslində soyuğa daha davamlı olub-olmaması ilə bağlı hələ dəqiq məlumat yoxdur. Colossal-ın Baş Elmi Direktoru Dr. Beth Shapiro, gen redaktəsinin müvəffəqiyyətinə diqqət çəkərək, hədəflənən genetik dəyişikliklərin bir çox siçanda tam olaraq həyata keçirildiyini ifadə edib. Layihə elmi dairələrdə həm həyəcan, həm də mübahisə yaradıb. Londondakı Francis Crick İnstitutunun kök hüceyrə bioloqu Robin Lovell-Badge, tədqiqatın texniki cəhətdən uğurlu olmasına baxmayaraq, siçanlarda genetik dəyişikliklərin arxasında duran bioloji mexanizmlərin tam başa düşülmədiyini vurğulayıb. O, həmçinin qeyd edib ki, mamontları geri qaytarmaq sadəcə bir neçə geni dəyişdirməklə mümkün olmayacaq. Eynilə Şeffild Universitetindən Dr Tori Herric də mamonta bənzər fillərin yaradılmasının gözlənildiyindən qat-qat çətin olacağını bildirib.
