Samsung MWC 2025 çərçivəsində bir sıra qatlana bilən smartfon konseptini təqdim etməklə yanaşı, bizlərə çantaya çevrilən noutbuk da nümayiş edib. Belə ki, “Flexible Briefcase” adlanan noutbuk qatlanan ekrana malikdir və bağlandıqda çantaya çevrilir.
Beləliklə, Cənubi Koreya mərkəzli texnologiya nəhəngi olan Samsung Barselonada keçirilən MWC 2025 tədbirlərində maraqlı açıqlama verib. Şirkət gözlənilmədən “Flexible Briefcase” adlandırdığı noutbuku elan edərək bütün diqqətləri öz üzərinə cəlb edib. Adətən smartfonlarda gördüyümüz qatlana bilən ekrana sahib olan bu noutbuk bağlandıqda özlüyündə bir çantaya çevrilir. Qeyd edək ki, Samsung Flexible Portfel açıldıqda 18,1 düymlük baxış sahəsi təqdim edən QD-OLED displeylə təchiz edilib. Təbii ki, bu ekranın alt hissəsi klaviatura məqsədləri üçün istifadə olunacaq. Habelə, QHD + təsvir ölçüsü də təklif edən ekran 184 PPI piksel sıxlığı ilə gündəlik istifadə üçün idealdır.
Yuxarıdakı fotoda gördüyünüz kimi, Samsung Flexible Briefcase çanta formalı korpusundan ayrılmır. Bu isə o deməkdir ki, siz metal çantanı açıb başqa məqsədlər üçün istifadə edə bilməzsiniz. Ancaq bu noutbuk üçün bir mənfi xüsusiyyət hesab oluna bilməz. Ümumiyyətlə, Samsung çantaya çevrilən noutbuk modelinin hələ konsept mərhələdə olduğunu bildirib. Yəni, cihazın nə vaxtsa kütləvi istehsala keçib-keçməyəcəyi bəlli deyil. Hətta, şirkət çantaya qatlana bilən noutbukunun xüsusiyyətləri ilə bağlı heç bir ətraflı izahat verməyib.
