Amazon Web Services Nova Ailəsi ilə süni intellekt və məzmun istehsalında yeni dövrə başlayıb. Belə ki, mətn, şəkil və video hazırlayan yeni süni intellekt alətləri ilə birlikdə Amazon birbaşa OpenAI ilə rəqib olur.
Amazon “Nova” adlı yeni süni intellekt ailəsini təqdim edib. Qeyd edək ki, Nova” mətn, şəkillər və video kimi müxtəlif media növlərini idarə edə bilən güclü alətlər təklif edir. AWS çərşənbə axşamı keçirilən re:Invent konfransında “Nova” adlı yeni süni intellekt model ailəsini elan edərək bütün diqqətləri öz üzərinə cəlb edib. Nova ailəsi mətn istehsal edən dörd fərqli modeldən ibarətdir: Micro, Lite, Pro və Premier.
Nova ailəsi, əsasən mətni emal sürəti və müxtəlif işlərdə müvəffəqiyyəti ilə seçilir. Təklif edilən 4 fərqli model arasından Mikro model yalnız mətni emal etməklə ən sürətli cavabları təmin edir. Lite və Pro modelləri mətnlə birlikdə şəkil və video məlumatlarını emal edə bilir. Premier modeli isə daha mürəkkəb tapşırıqlar üçün nəzərdə tutulub və ən güclü variant kimi seçilir. Bundan əlavə, şəkil və video istehsalı üçün Nova Canvas və Nova Reel modelləri mövcuddur. Modellərin kontekst pəncərələri 128.000 token ilə 2 milyon token arasında dəyişir. Habelə, Nova 15 fərqli dildə xidmət göstərə bilir. AWS bildirib ki, Nova təkcə səmərəli və sürətli deyil, həm də güclü təhlükəsizlik tədbirləri təklif edir. Canvas və Reel istifadəçilərin tələblərinə uyğun olaraq fərdiləşdirilə bilən şəkil və video istehsal vasitələri təklif edir. AWS dezinformasiya və zərərli məzmunun istehsalını məhdudlaşdırmaq üçün təhlükəsizlik xüsusiyyətləri də əlavə edib.
