Smartfon bazarında son vaxtlar Çin şirkətləri münasib qiymətə bir-birindən rəqabətcil modellər təqdim edirlər. Məsələn, ən son məlumat verdiyimiz Honor X40 modeli 220 dollar qiymətə premium görünüşlü dizayn, qıvrımlı ekran paneli gətirməsi ilə fərqlənirdi. İndi isə ekran altı kamera texnologiyası ilə bazarda sektorun liderlərindən olan ZTE şirkəti Axon 30s modelini təqdim edib. Bu model dünyanın ən ucuz və ən yüksək performans göstərən ekran altı kamerasına sahib smartfonu sayılır. Özlüyündə keçən il debüt etmiş ZTE Axon 30 modelinin yenilənmiş halı olan cihaza gəlin yaxından nəzər salaq.
ZTE Axon 30s modeli dizayn cəhətdən olduqca sadə elementlərə sahibdir. Smartfonun sol üst hissəsində 2 fərqli kamera modulu daxilində ümumilikdə 4 fərqli kamera sensoru quraşdırılıb. Smartfonun arxa qapağı üzərində isə bəzi işləmələr və nəhəng Axon yazısı diqqət çəkir.
Texniki cəhətdən də Axon 30 ilə demək ola tamamilə eyni olan bu model öz gücünü Snapdragon 870 çipsetindən alır. UFS 3.1 və LPDDR 5 yaddaş həllərini də mənimsəyən cihaz ortalamanın xeyli üstündə performans göstərəcəkdir.
Ekran altı kamera texnologiyasına sahib ZTE Axon 30s modeli 6.92 düymlük nəhəng OLED ekrana malikdir. 10 bit rəng dərinliyi vəd edən ekran panelinin təsvir ölçüsü FHD+ olub, görüntü yeniləmə tezliyi 120Hz təşkil edir. Əlavə olaraq DC, TUV, SGS tipli göz qoruması sertifikatlarını əldə edib.
Arxa tərəfdə 64MP əsas, 8MP 119˚ ultra-geniş bucaqlı, 5MP makro, 2MP dərinlik kamerası quraşdırılıb. Çox sayda kamera sensoru sizə güclü kimi görünməsin. Çünki, kamera performansı düşünüyünüz qədər güclü deyil. Texniki cəhətdən kamera parametrləri biraz zəif qalıb. Ekran altına yerləşdirilmiş selfi kamerası isə 16MP təsvir ölçüsünə malikdir.
Smartfonun 4200 mAs həcmli batareyası 55 Vt sürətli şarj dəstəkləyir. Selfi kamerasından əlavə barmaq izi sensoru da ekranın altına quraşdırılıb. Android 12 üzərinə MyOS 12 interfeysi ilə qutudan çıxır.
ZTE Axon 30s modelinin qiyməti
Yeni Axon 30s modelini boş yerə ən ucuz və ən yüksək performanslı ekran altı kamera texnologiyası təklif edən cihaz adlandırmırıq. Belə ki, ZTE Axon 30s modelinin 8-128GB yaddaş variantı üçün qiyməti 236$ (1698 Yuan) təşkil edir. Smartfon ilk növbədə Çin bazarında satışa çıxarılıb. Qlobal bazara gəlməsi gözlənilsə də dəqiq tarix hələ ki, mövcud deyil.
FOTO | ZTE Axon 30s
