Ötən həftə haqqında bəhs etdiyimiz Honor X40 modeli rəsmi olaraq Çində təqdim edilib. İnanılmaz dərəcədə premium görünüşə malik, lakin bir o qədər də münasib qiymətə təklif edilən smartfona çox uzatamadan yaxından nəzər salaq.
Smartfonun dizaynından danışaraq başlasaq, dizaynı ilə həqiqətən göz oxşayır. Qıvrımlı ekranı və çox erqonomik görünən gövdəsi yaxşı diqqət çəkir. Lakin premium görünüşünə baxmayaraq plastik gövdə elementlərini və nisbətən zəif texniki xüsusiyyətləri özündə birləşdirən cihazın qiyməti xeyli ucuzlaşdırıla bilib. Arxa tərəfdəki nəhəng halqa zəif kamera parametrlərini güclü kimi göstərməyə mükəmməl şərait yaradıb. Kamera modulunun ortasına isə güclü kamera hissiyatı yaradan MATRIX sözü əlavə edilib.
Honor X40 modeli yanlardan qıvrımlı 6.67 düymlük FHD+ AMOLED ekran paneli əldə edib. 120Hz görüntü yeniləmə və 300Hz sensor tezliyinə sahib bu model eyni zamanda ekrandan barmaq izi oxuyucusuna da malikdir. Ekranın kənar çərçivələri də minimuma endirildiyi üçün 94%-lik ekranın gövdə nisbəti vəd edir. Qeyd edək ki, smartfon öz gücünü Snapdragon 695 çipsetindən alır.
Kamera parametrlərinin zəif olduğunu qeyd etmişdik. Honor şirkəti bu smartfona F/1.8 50MP təsvir ölçülü əsas, F/2.4 2MP dərinlik sensor quraşdırıb. LED işıq isə modulun ən üst hissəsinə quraşdırılıb. MATIX AI VISION CAMERA adlı Honor şirkəti tərəfindən təkmilləşdirilən proqram təminatı görüntü keyfiyyətini müəyyən qədər yaxşılaşdıra bilər. Lakin Honor X40 modeli o qədər də yaxşı kamera performansına malik olmayacaq. Selfi kamerası isə 8MP təşkil edir.
Batareyası 5100 mAs olub, 40 Vt sürətli şarj dəstəkləyir. Android 12 üzərinə Magic UI 6.1 interfeysi ilə qutudan çıxır. Ağırlığı isə 172 qram təşkil edir ki, ideal səviyyədədir. Ən əsas məsələ isə cihazın qiymətidir.
Honor X40 ilə bağlı digər görüntülər və qiyməti
Honor X40 modelinin başlanğıc qiyməti 6-128GB yaddaş variantı üçün 220$ təşkil edir. Yəni bu cihaz işi həqiqətən gündəlik istifadə olan, gözəl görünüş axtaran alıcılar üçün nəzərdə tutulub. Qlobal bazarda smartfonun nə vaxt təqdim ediləcəyi məlum olmasa da Honor X10 olaraq gətirilməsi gözləniləndir. Əgər münasib qiymətə qlobal bazara gəlsə mükəmməl seçimlərdən biri olacaq.
ŞƏKİLLƏRİN GÖTÜRÜLDÜYÜ MƏNBƏ | HONOR X40
