Dünyanın ən məşhur platformalarından biri olan YouTube yeni direktoru ilə yeni dövrə qədəm qoyur. Belə ki, YouTube platforması bir neçə süni intellekt alətləri ilə təkmilləşdiriləcək. Xatırladaq ki, platformanın yeni baş icraçı direktoru artıq Neal Mohan olub. Həmçinin, Neal son aylardan platforma ilə bağlə mühüm açıqlamalar da verib. Bunlardan ən əhəmiyyətlisi də məhz süni intellekt alətləri ilə bağlı olan qərarlardır. Made On YouTube tədbirində platformaya əlavə ediləcək yeni süni intellekt əsaslı funksiyalar barədə məlumat verilib.
Beləliklə YouTube çox yaxında süni intellekt alətləri ilə tamamilə fərqli platformaya çevriləcək. Maraqlısı budur ki, yeni süni intellekt alətləri əsasən məzmun yaradıcılarını hədəf alır. Artıq yeni süni intellekt alətləri ilə platformada daha çox video hazırlanacaq. Məzmun yaradıcıları süni intellekt alətlərindən istifadə edərək öz videolarını dublyaj edə, arxa fonunu yenidən dizayn edə biləcək. İlk olaraq Dream Screen xüsusiyyətindən bəhs edək. Bu xüsusiyyət ilə artıq məzmun yaradıcıları Shorts-dakı qısa videoları üçün süni intellekt ilə arxa fon şəkli seçə biləcək. Bundan əlavə artıq bir çox yaradıcı tərəfindən istifadə olunan dublyaj xüsusiyyəti daha asan olacaq.
YouTube Studio tərəfində əlavə ediləcək süni intellekt alətləri isə videolar barədə dizayn və idea təklif edəcək. Habelə məzmun yaradıcıları auditoriyası arasında hansı məzmunun populyar olduğuna əsasən fərdiləşdirilmiş tövsiyələr alacaqlar. Dublyaj tərəfində isə Area 120 startap inkubatorunun üzvü olan Aloud komandası imdada yetişəcək. Bundan əlavə süni intellekt alətlərindən istifadə edilən videolar çox güman ki, xüsusi işarə ilə etiketlənəcək. Çünki bu gün bir çox platformada süni intellekt tərəfindən hazırlanan məzmunlar izləyicilərə xüsusilə bildirilir.
