Bildiyimiz kimi, bu il smartfon bazarında satışlarda durğunluq hətta azalma müşahidə olunmuşdu. Lakin Goldman Sachs və Morgan Stanley adlı analitiklərin fikrincə süni intellekt smartfon bazarını gələn il canlandıracaq. Ümumiyyətlə artıq bir çox texnologiya nəhəngi o cümlədən Samsung, Vivo və Apple kimi brendlər öz cihazlarında süni intellekt alətlərindən istifadə etməyə başlayıb. Hətta cənubi koreya mərkəzli samsung brendi gələn ilin əvvəlində təqdim edəcəyi Galaxy S24 seriyasını AI Phone olaraq da adlandırıb.
Analitiklərin fikrincə smartfonların süni intellekt texnologiyaları ilə təchiz edilməsi onlara olan marağı canlandıracaq. Süni intellekt bu il həyatımızın ayrılmaz bir parçasına çevrilməyi bacardı. Məhz bu vəziyyətin ən böyük səbəbkarı isə ChatGPT süni intellekt çatbotunu yaradan OpenAI şirkətidir. ChatGPT bu il populyarlıq əldə etdikdən sonra demək olar ki, bütün texnologiya nəhəngləri süni intellektə meyl etdi. O cümlədən bura Bing, Google kimi axtarış mühərrikləri də aiddir. Yekunda isə smartfon nəhəngləri öz cihazlarına süni intellekt əsaslı funksiyalar əlavə etməyə başladı.
Bu il süni intellekt əsaslı bir çox proqram meydana gəldi. Bunlara insanların üzünü və səsini dəyişdirə bilən, sadəcə bir neçə söz əsasında şəkil yaradan və digər süni intellekt alətləri və ya proqramları aiddir. İndi isə Apple, Vivo, Xiaomi, Samsung kimi nəhəng smartfon istehsalçıları öz cihazlarında süni intellekt əsaslı funksiyalara üstünlük verəcək. Məhz bu addım da gələn il smartfonlara olan marağın artmasına, o cümlədən smartfon bazarının canlanmasına səbəb olacaq. Mütəxəssislərin fikrincə süni intellekt smartfon bazarını canlandıracaq və qlobal smartfon tədarükü 2025-ci ilə qədər 2022-ci ildəki səviyyəsinə geri qayıdacaq.
