Cənubi Koreyalı texnologiya nəhənginin yeni orta səviyyətli cihazı barədə məlumatlar ortaya çıxıb. Belə ki, Samsung brendinin orta səviyyəli smartfon bazarında mübarizə aparacağı Galaxy A55 modelinin dizaynı sızdırılıb. Ortaya çıxan render dizayn görüntülərində maraqlı detal diqqət çəkib. Görünən odur ki, texnologiya nəhəngi yeni orta səviyyəli smartfonunun yan tərəfinə çıxıntı əlavə edəcək. Galaxy A54 modelindən fərqli olaraq Galaxy A55 daha fərqli çərçivəyə sahib olacaq.
Ümumiyyətlə ortaya çıxan yeni görünütülər CAD faylları vasitəsilə kompüterdə hazırlanıb. MySmartPrice mənbəsi tərəfindən paylaşılan görüntülərdə ən diqqət çəkən detal yan tərəfdəki çıxıntı olub. Çox güman ki, bu çıxıntının daxilində səsi artırma və azaltma, barmaq izi sensorlu güc düyməsi yer alır. İlk baxışdan bu çıxıntı qəribə görünsə də, Samsung bunu smartfona çox yaxşı inteqrasiya edib kimi görünür. Təbii ki, kompüterdə hazırlanmış bu dizayn görüntüləri smartfonun real görüntüsündən fərqlənə bilər.
Samsung bu dəfə də üçlü kamera dizaynından əl çəkməyib və selfie kamerası ekran dəliyi şəklində yerləşdirilib. Maraqlısı budur ki, smartfon qalın ekran çərçivəsinə sahibdir. Hətta bu çərçivə o qədər qalındır ki, ilk baxışdan ən çox diqqəti də məhz bu cəlb edir. Artıq orta səviyyəli smartfon bazarında bir çox cihazda belə dizayndan istifadə edilmir. Məhz ekran çərçivəsi tərəfdən Samsung brendinin Galaxy A55 modelinin dizaynı tənqid edilib. 161,1 x 77,3 x 8,2 mm ölçülərə sahib smartfon gələn ilin ilk rübündə təqdim ediləcək.
