Son illərdə süni intellekt sahəsində əldə olunan yeniliklər və eləcə də uğurlar həqiqətən də heyrət doğurur. Bu dəfə isə süni intellekt bir ilkə imza ataraq ölü heyvanları danışdıra biləcək.
Cambridge Universitetinin Zoologiya Muzeyində başlanan innovativ süni intellekt layihəsi ölü heyvanları danışdıra bilməyə imkan verir. Bu layihə sayəsində muzey kolleksiyalarında olan müxtəlif heyvanlar ziyarətçilərlə şifahi və ya yazılı şəkildə əlaqə saxlaya bilir. Amerika tarakanından qırmızı pandaya, və ya balinadan nəsli kəsilmiş dodo quşuna qədər nümayiş etdirilən heyvanlar indi öz həyat hekayələrini və təbiətlə təcrübələrini istifadəçilərlə bölüşə biləcəklər. Layihə Nature Perspectives adlı şirkət tərəfindən hazırlanmış süni intellekt modelləri ilə həyata keçirilib. Bu modellər sərgilənən heyvanların harada yaşadığı, onların təbii mühiti və muzey kolleksiyasına necə daxil olduqları kimi məlumatları ziyarətçilərə çatdırmaq üçün proqramlaşdırılmışdır və süni intellekt texnologiyası heyvanların insanlarla daha təsirli bir şəkildə əlaqə qurmasına kömək etmək məqsədi daşıyır.
Muzeyin direktor müavini Jack Ashby, bildirir ki, layihənin məqsədi süni intellektin obyektlər baxımından danışmasıdır. O həmçinin qeyd edib ki, “Biz bu heyvanlara səs verəndə insanların onlara baxışlarının dəyişib-dəyişmədiyini görmək istəyirik”. Layihə həm də ziyarətçilərin bu heyvanlarla söhbətlərini təhlil etmək məqsədi daşıyır. Beləliklə, muzey insanların sərgilənən heyvanlardan hansı məlumatları öyrənmək istədiklərini daha yaxşı anlaya biləcək.
