Microsoft şirkəti tərəfindən Windows 10 dəstəyinin sona çatacağı tarix rəsmi olaraq açıqlanıb. Beləliklə, Microsoft 2015-ci ildə təqdim edilən əməliyyat sistemi ilə rəsmi şəkildə vidalaşır.
İlk dəfə 2015-ci ildə təqdim edilən Windows 10 üçün yolun sonu yaxınlaşır. Çıxdığı gündən sürətlə mənimsənilən və bəyənilən əməliyyat sistemi, düz 1 ildən sonra istifadəçilərlə vidalaşacaq və yeniləmələr almayacaq. Microsoft-dan verilən açıqlamaya görə, 2025-ci il oktyabrın 14-də Windows 10 əməliyyat sisteminə dəstəyini rəsmi olaraq dayandırmağı planlaşdırır. Bu nöqtədə, 22H2 Windows 10 üçün son buraxılmış versiya olacaq və daha heç bir yeniləmə təklif edilməyəcək. Onu da qeyd edək ki, Windows 10 üçün aylıq yeniləmələr şirkət tərəfindən elan edilən son tarix də daxil olmaqla davam edəcək.
Ümumiyyətlə, Microsoft şirkətinin Windows 10-un fəaliyyətini dayandırdıqdan sonra Windows 11-i əsas əməliyyat sistemi etmək istədiyi hər kəsə məlumdur. Lakin bu proses baş verərkən belə, Windows 10 planetdə ən çox istifadə edilən əməliyyat sistemi olaraq qalır. Paylaşılan son statistikalar onun bazar payının 64,99%-nə sahib olduğunu göstərir. Windows 11 boşluğu aradan qaldırmağa davam edir, lakin hələ də sələfinin gücünə çata bilmir. Bəs bu tarixdən sonra nə olacaq?
Təəssüf ki, cari cihazınız Windows 11 ilə uyğun gəlmirsə, etməli olduğunuz üç seçim var. Birincisi, yeni noutbuk almalı ola bilərsiniz və bu, Microsoftun bir çox insana tövsiyə etdiyi məsləhətdir. Digər seçim Microsoft-un Genişləndirilmiş Proqram Yeniləmələri (ESU) üçün qeydiyyatdan keçməkdir. Bununla belə, qeyd etmək lazımdır ki, bu xidmətin qiyməti illik 61 dollardır və bu, hələlik yalnız biznes üçün mövcuddur. Nəhayət, son seçim də heç bir şey etməməkdir. Belə ki, Windows 10 14 oktyabr 2025-ci il tarixindən sonra işləməyə davam edəcək, lakin bu tarixdən sonra onun istifadəsi əhəmiyyətli risk daşıyır. Eyni şəkildə, dəstəyin dayandırılması ilə bu əməliyyat sistemini idarə edən kompüterlər vacib yenilənmələr əldə etməyəcək və onlar kiberhücumlara və təhlükəsizlik zəifliklərinə qarşı həssas olacaq
