Hər gün süni intellektin müxtəlif sahələrdə tətbiqi ilə qarşılaşırıq. Məsələn, bu yaxınlarda süni intellektlə bağlı paylaşdığımız ən maraqlı xəbərlərdən biri aviasiya sektoru ilə bağlı idi. Mövzu nədən ibarət idi desəniz, Amerikalı mütəxəssislər təyyarələri süni intellektlə idarə edə biləcək sistem hazırlayırdılar. Gördüyünüz kimi süni intellekt həyatımızın bir çox yerinə daxil olub. Belə məşhurlaşan texnologiya normal olaraq dövlətlərin də diqqətini çəkir. Hal-hazırda süni intellekt dövlət müəssisələrində müxtəlif proseslərin avtomatlaşdırılmasına imkan yaradır. Lakin bəzi ölkələrdə süni intellektlə “idaretmə” tamam fərqli səviyyəyə çatıb. Belə ki, Fransada süni intellekt peyk nəzarəti ilə 10 milyon avro vergi toplayıb.
Süni intellekt Fransada minlərlə qeydiyyatsız, vergi ödənilməyən hovuz aşkarlayıb
Fransanın İT firması olan Capgemini tərəfindən hazırlanmış süni intellekt Fransız vergi idarəsinin çox yaxşı işinə yarayıb. Süni intellekt sistemi Google şirkətinin peyk görüntülərini analiz edə bilir. Fransız vergi idarəsinə də məhz peyk görüntüləri ilə hovuzları təyin etmək lazım olub.
Məsələn, 30 kvadrat metrlik hovuza sahibsinizsə evinizdə əlavələr etmiş hesab edildiyiniz üçün təqribi 200 avro miqdarında vergi ödəməlisiniz. Bir çox sakin öz həyətində hovuz hazırladıqdan sonra heç bir vergi ödəmir və ümumiyyətli bunu dövlətə bəyan etmir. Nəticədə problemə həll yolu axtaran vergi orqanı süni intellekt ilə vergi toplamaq qərarı alıb.
Verilən məlumata görə süni intellekt indiyə qədər 20.356 ədəd qeydiyyatsız hovuz təyin edib. Nəticədə Fransız vergi idarəsi 10 milyon avroya yaxın vergi toplayıb. Ötən ilin oktyabr ayından fəaliyyətə başlayan sistem başlarda yaxşı işləməyib. Peyk görüntülərindən mavi və düzbucaqlı əraziləri axtaran sistem əvvəllər günəş panellərini hovuzlarla qarışdırıb. O vaxtlar təqribi 30% xəta payına sahib süni intellekt sistemi deyilənə görə hal-hazırda problemsiz və dəqiq işləyir.
Qeyd edək ki, süni intellekt sistemi hələ Fransanın bütün şəhərlərini əhatə etməyib. Proqram tezliklə ölkəni tamamilə əhatə etdikdə təqribən 40 milyon avroya yaxın vergi toplanacağı təxmin edilir. Xeyli vaxtdır Google ilə vergi mübahisələri yaşayan Fransanın, Google infrastrukturu ilə vergi toplamağı da ayrı bir müzakirə mövzusudur. Hətta süni intellekt sistemini hazırlayan Capgemini də bu səbəblə ayrıca tənqid edilir.
