james Webb teleskopunun iyul ayı çəkdiyi möhtəşəm şəkilləri yəqin ki, bir çoxlarınız xatırlayırsınız. NASA-nın kosmosa göndərdiyi məşhur James Webb teleskopundan əvvəl Hubble kosmik teleskopundan istifadə edilirdi. Müasir dövrdə isə Hubble teleskopunun yetərsiz olduğu fikirləri Webb ilə qeydə alınan görüntülərdən sonra bir daha təsdiqləndi. Lakin 31 ilə yaxındır fəaliyyət göstərən Hubble teleksopunun elmə verdiyi töhfə və sahib olduğu bacarıqlar unudula bilməz. Belə ki, Avropa Kosmik Agentliyi maraqlı bir araşdırma apararaq Hubble və James Webb teleskoplarından gələn görüntüləri birləşdirməyə qərar verib. Nəticədə isə çox möhtəşəm bir görüntü ortaya çıxıb.
Hubble və James Webb bu layihədə ilk dəfə birlikdə işləyiblər
Astronomlar “Phantom” deyə tanınan spiralvari M74 qalaktikasını hədəf alıblar. 32 milyon işıq ili uzaqlıqda yerləşən bu qalaktika mərkəzə doğru uzanan burulğanvari qolları ilə diqqət çəkir. Görüntünü qeydə almaq üçün isə hər bir teleskop fərqli diapazonlarda işləyib. Yeni göndərilən Webb infraqırmızı diapazonda olan şəkilləri çəkərkən, Hubble teleskopu ultrabənövşəyi diapazonda görüntülər çəkib. Daha sonra isə bu iki diapazonda olan şəkillər birləşdirilərək ən dolğun formaya gətirilib.
Astronomların fikrincə qeydə alınmış bu görüntü Hubble teleskopunun elm üçün hələ də yetəri qədər yararlı olduğunu sübut edir. Bu görüntülər müxtəlif dalğa uzunluqlarında olan məlumatları özündə birləşdirir. Ona görə də ulduz əmələ gələn bölgələri dəqiqləşdirməyə, ulduz klasterlərinin kütlələrini, yaşını ölçməyə və.s yaxşı işə yarayacaq.
