Google yeni addımı ilə rəqibi Microsoft-un Bing mühərrikinə və süni intellekt çatbotuna zərbə vura bilər. Belə ki, artıq saytlar neyron şəbəkələrinin onların məzmunundan istifadə etməsini Google-da qadağan edə biləcək. Artıq heç kimə sirr deyil ki, böyük texnologiya şirkətləri öz neyron şəbəkələrini öyrətmək üçün internet məzmunundan istifadə edirlər. Məhz bunun qarşını ala bilmək üçün Google yeni Google-Extended adlı nəzarət xidmətini istifadəyə verib. Beləliklə bu nəzarət sayəsində veb sayt administratorları axtarış nəhənginə Bard və Vertex alqoritmlərini öyrətmək üçün onların nəzarəti altında olan resurslarda dərc olunan məzmundan istifadə etməyi qadağan edə biləcəklər.
Google bildirib ki, “Google-Extended xidmətini istifadəyə verilməsi ilə sayt sahibləri veb-saytların performansını yaxşılardırmaq üçün Bard və Vertex-in vendor API-lərdən istifadə edib-etmədiyini yoxlaya biləcəklər”. Təbii ki, hərbir adminstrator öz saytından məsuldur və onların məzmunları üzərində hüquqları var. Lakin bu addım süni intellekt alətlərini o cümlədən neyron şəbəkələri zəiflədə bilər. Yəni neyron şəbəkələr saytlar üzərindən istədiyi kimi məlumat əldə edə bilməyəcək.
Onu da qeyd edək ki, Google-Extended nəzarəti vebsaytın robot.txt faylına əlavə edilə bilən bir funksiya kimi işləyir. Bu fayl axtarış alqoritmlərinə saytda hansı məzmunun indeksləşdirilməməsi lazım olduğunu bildirmək üçün istifadə olunur. Sayt sahibləri populyar ChatGPT-nin arxasında duran şirkət olan OpenAI və digər neyron şəbəkə əsaslı alqoritmləri bloklamaq üçün artıq müvafiq nişanı əlavə edə bilərlər. Bununla da sayt sahibləri məzmunlarının süni intellekt tərəfindən istifadə edilməsindən narahat olmayacaqlar.
