Çin alimləri irimiqyaslı kompüter simulyasiyalarında Çin Xalq Azadlıq Ordusunun (PLA) qüvvələrinə rəhbərlik edə biləcək süni intellekt komandiri hazırlayıblar. Qeyd edək ki, yeni süni intellekt təcrübəli bir insan komandiri təqlid edərək qərarlar qəbul edir və döyüşün gedişatına uyğunlaşır. Süni intellekt öz strategiyasını və taktikasını qələbə və məğlubiyyətlərindən öyrənərək təkmilləşdirir. Çin süni intellekt tərəfində hər ötən gün yenilik etməyə və ilklərə imza atmağa davam edir.
Qeyd edək ki, Çin alimləri tərəfindən dünyada ilk dəfə olaraq hazırlanan süni intellekt komandiri həmçinin şəxsiyyət xüsusiyyətlərini də fərdiləşdirə bilir. Yeni süni intellekt komandirinin ən üstün cəhətlərindən biri isə yuxuya ehtiyac duymamasıdır. Belə ki, bu xüsusiyyət sayəsində AI komandiri real döyüş əməliyyatlarında daha uğurlu ola bilər. Əlavə olaraq onu məhv etmək çətindir, çünki məlumat emalı mərkəzlərinə əsaslanır. Çin Xalq Azadlıq Ordusu Tayvan və Cənubi Çin dənizi kimi bölgələrdə mümkün hərbi münaqişələr üçün bir çox əməliyyat planları hazırlayıb. Alimlərin ən mühüm vəzifəsi bu planları simulyasiyalarda sınaqdan keçirmək, onların üstünlüklərini və mənfi cəhətlərini qiymətləndirmək və mümkün müharibə ssenariləri haqqında təsəvvür əldə etməkdir.
Hərbi təlimlər çox vaxt gözlənilməz vəziyyətlərə və yeni məlumat daxilolmalarına cavab olaraq operativ qərarlar qəbul etməli olan həqiqi yüksək səviyyəli komandirlərin iştirakını tələb edir. Lakin PLA-dakı bu komandirlərin sayı və elmi təcrübələr üçün əlçatanlığı məhdud olduğundan, onların bir çox hərbi simulyasiyalarda iştirak etməsi mümkün deyil. Shijiazhuang şəhərindəki Milli Müdafiə Universitetində hazırlanmış süni intellekt komandiri onları uğurla əvəz edir. Laboratoriya şəraitində o, heç bir insan müdaxiləsi olmadan sərbəst və ən əsası müvəffəqiyyətlə qoşunlara komandanlıq edə bilir.
