Bildiyimiz kimi, Apple ötən günlərdə təşkil etdiyi tədbirdə yeni əməliyyat sistemlərini təqdim edib. Məhz bu tədbirdə iOS 18 sisteminin yeni süni intellekt xüsusiyyətlərinə sahib olması və Apple şirkətinin OpenAI ilə əməkdaşlığı diqqət çəkmişdi. İndi isə Xiaomi HyperOS sisteminə ChatGPT tərzli yeni süni intellekt funksiyaları əlavə edir. Belə ki, HyperOS beta artıq bir çox yeniliyi bizlərə təklif edir.
Xiaomi şirkəti, HyperOS sisteminin beta versiyasına məhsuldar süni intellekt funksiyaları əlavə edib. Ümumiyyətlə, süni intellekt texnologiyasının mobil əməliyyat sistemlərinə inteqrasiyası indi trendə çevrilib. Bu istiqamətdə işlərini davam etdirən Xiaomi-nin HyperOS əməliyyat sisteminə süni intellektə əsaslanan funksiyalar əlavə etməyə hazırlaşdığı məlum olub. Çin nəhəngi Xiaomi 14 üçün HyperOS beta versiyasında Notes tətbiqinə süni intellekt funksiyaları əlavə edib. Beləliklə, neyron şəbəkə avtomatik olaraq tətbiqə yazılmış və ya yapışdırılmış mətnlərin xülasəsini yarada bilər. Bundan əlavə, süni intellekt internetdən əlavə məlumat verməklə bu mətni zənginləşdirə bilər.
Yeni funksiyalar üzrə testlər potensial senzura mexanizmini də ortaya çıxarıb. Tiananmen Meydanı haqqında məqalədən xülasə yaratmağa çalışarkən, AI “bu məzmun həssasdır” cavabını verir. Bu isə Xiaomi-nin süni intellekt alətlərinə məzmun moderasiyası funksiyalarını əlavə edə biləcəyini göstərir. Maraqlısı budur ki, HyperOS-da AI funksiyaları internet bağlantısı tələb edir. Bu, məlumatların uzaq serverlərdə işləndiyini göstərir. Qeyd edək ki, test indiyədək yalnız HyperOS-un Çin versiyasında aparılıb.
