ABŞ mərkəzli texnologiya nəhəngi olan Apple, indi diqqətini daha sərfəli Vision başlığına yönəldir. Xatırladaq ki, şirkətin ilk qarışıq reallıq eynəyi olan Vision Pro 3500 dollar qiymət etiketinə sahib olmuşdu. Məhz bu qiymətinə görə mübahisə mövzusuna çevrilən qarışıq reallıq eynəyinin daha sərfəli versiyası hazırlanır.
![sərfəli Vision](https://tedroid.com/media/2024/06/apple-serfeli-vision-eyneyi-hazirlayir.jpg)
Əlbəttə ki, 3500 dollar müasir dövrdə bir çox rəqibi olan qarışıq reallıq eynəyi üçün inanılmaq qiymətdir. Buna görə də, Apple brendi növbəti “Vision” modelini daha sərfəli etmək üçün hazırlıqlara başlayıb. Bildirilir ki, Vision Pro-nu inkişaf etdirən komanda hazırda Vision Pro 2 modeli deyil, daha sərfəli başlıq üzərində işləyir. Komandanın xüsusilə Vision Pro-da istifadə edilən hissələrin dəyərini azaltmaq üçün planlar hazırladığı bildirilir. 2025-ci ilin sonunda bazara çıxarılması hədəflənən sözügedən daha sərfəli modelin bəzi təxminlərə görə qiyməti 2 min dolların altında ola bilər.
Qeyd edək ki, Apple şirkəti Vision Pro modelini 28 iyun tarixindən etibarən yeni ölkələrdə və bölgələrdə mövcud olan mağazalarında satışa çıxaracaq. Hazırda yalnız ABŞ-da satılan Vision Pro 13 iyun Cümə axşamından başlayaraq Çinin materik hissəsində, Honq-Konqda, Yaponiyada və Sinqapurda əvvəlcədən sifariş verilə bilər. Habelə, Vision Pro bu ölkələrdə 28 iyun Cümə günündən etibarən satın alınacaq. Apple şirkətinin baş direktoru Tim Cook bildirib ki, “Biz məkan hesablamasının sehrini bütün dünyada daha çox müştəriyə çatdırmaqdan məmnunuq. Vision Pro ilə istifadəçilər tətbiqlər üçün sonsuz bir kətan üzərində işləyə və əməkdaşlıq edə, qiymətli xatirələri 3D formatında canlandıra, unikal şəxsi kino təcrübəsində televiziya şoularına və filmlərə baxa və təxəyyüllərini çılğınlığa buraxa bilərlər”.