Süni intellekt alətlərinin gün keçdikcə inkişaf etdiyi və yeni funksiyalar ilə qarşımıza çıxdığı artıq hər kəsə məlumdur. Belə ki, süni intellekt ilə artıq xəyalımızda olan videonu, şəkili və ya qrafikanı, hətta oyunu belə hazırlamaq mümkündür. Böyük Britaniya hökuməti isə müəyyən mətnlərin redaktəsi tapşırıqları üçün məmurları süni intellekt ilə əvəz etmək istəyir. Beləliklə, hökumət dövlət büdcəsində böyük qənaət edə biləcəyini bildirir.
Ümumiyyətlə, uzun müddətdir ki, süni intellekt sistemlərinin iş yükü tələb edən bir çox sektorda insanları əvəzləyəcəyi gündəm mövzusudur. Hətta bu mövzu insanlar arasında mübahisələrə, təşvişə də səbəb olub. Artıq ChatGPT inqilabı ilə birlikdə zehni gün tələb edən işləri süni intellekt də yerinə yetirə bilir. Maraqlısı budur ki, əksər hallarda süni intellekt bu işin öhdəsindən insanlardan daha yaxşı gəlir. Britaniya hökuməti bir müddətdir ki, məmurların yerinə yetirdiyi bir çox işi süni intellekt alətlərinə öyrətmək üçün çalışır. Bunlara konkret mənbələrdən məlumatların ümumiləşdirilməsi, qanunvericilik təkliflərinə parlament suallarının tərtib edilməsi və ictimai məsləhətləşmələrə cavab verilməsi daxildir.
İngiltərə Baş nazirinin müavini Oliver Dowden, dövlət xidmətlərində istifadə edilməsi planlaşdırılan bu süni intellekti ictimaiyyətə elan etməyə hazırlaşır. Bildirilib ki, bu süni intellekt sistemi 25 məmurun 3 ayda hazırlaya biləcəyi məlumatı qısa bir müddətdə hazırlayıb. Qeyd edək kİ, hökumət bu süni intellekt sistemini formalaşdırmaq üçün ötən il Google, OpenAI və Anthropic kimi şirkətlərlə görüşlər keçirib. Xüsusilə pandemiya dövründə sayı sürətlə artan məmurların sayını azaltmaq üçün süni intellektin inteqrasiyası Böyük Britaniya hökuməti üçün böyük əhəmiyyət kəsb edir.
