Ən populyar mesajlaşma proqramı olan WhatsApp yeni funksiyalar qazanıb. Təkcə mesajlaşmada deyil, görüntülü zənglərdə də çox iddialı olan WhatsApp, yeni funksiyasını istifadəyə verdiyini açıqlayıb. Belə ki, verilən məlumata görə, videozənglər üçün WhatsApp picture-in-picture, yəni “şəkil içində şəkil” funksiyası istifadəyə verilib. Bu xüsusiyyət sayəsində WhatsApp üzərindən videozəng edərkən başqa proqrama keçsəniz belə, videozəng fasiləsiz davam edəcək.
İlk dəfə ötən ilin dekabrında WhatsApp tərəfindən elan edilən xüsusiyyət təxminən 2 aylıq beta müddətindən sonra istifadəyə verilmişdir. WhatsApp tərəfindən verilən məlumata görə, picture-in-picture funksiyası zəng zamanı kiçildilmiş video ekranı sayəsində zəng zamanı başqa işləri asanlıqla yerinə yetirməyə imkan verir.
Xatırladaq ki, bu funksiyadan əvvəl WhatsApp-da videozəng edərkən başqa proqrama keçdiyiniz zaman şəkliniz görünməz olurdu. Bir sözlə, zəng davam etsə də, videozəng etdiyiniz şəxs sizi görə bilmir. Yeni “picture-in-picture” funksiyası ilə siz videozəng edərkən videonu kəsmədən telefonunuzdakı digər proqramlardan istifadə edə biləcəksiniz. WhatsApp-ın video zənglər üçün təklif etdiyi yeni funksiyası 2018-ci ildə Android platforması üçün istifadəyə verilib. Təxminən 5 il gözləmədən sonra 23.3.77 yeniləməsi ilə şəkil içində şəkil funksiyası iOS platforması üçün də əlçatan oldu.
“Picture-in-picture” funksiyası ilə yanaşı, “WhatsApp” həm iOS, həm də Android istifadəçiləri üçün fayl göndərərkən altyazı əlavə etmək imkanı gətirdiyini açıqladı. Son olaraq onu da qeyd edək ki, WhatsApp eyni anda 100 şəkil və ya sənəd göndərməyə imkan verən funksiyanı sınaqdan keçirməyə başlayıb.
