Yəqin ki, smartfonunuzu yaranan problemlər səbəbilə 1 dəfə də olsa tanımadığınız ustalara əmanət etmisiniz. Ustaların smartfondakı şəxsi məlumatlarınızla işi olmasa belə, içinizdə yenə də məlumatlarınızın təhlükəsizliyi ilə bağlı bəzi narahatlıqlar yarana bilər. Çünki, bəzən ustalar cihazınızı təmir etdikdən sonra problemli hissənin düzəlib-düzəlmədiyindən əmin olmaq üçün smartfonu test etmək məqsədilə parolu sizdən istəyirlər. Parolu verdikdə aydın məsələdir ki, tanımadığınız şəxs sizin bütün fayllarınıza, şəkil, kontakt, videolarınıza və.s giriş əldə edir. Nəticədə şəxsi məlumatlarının təhlükəsizliyinin əhəmiyyətli olduğunu düşünən insanlar bu vəziyyətdən narahat olur. Samsung şirkəti problemi həll etmək üçün smartfonlarında “təmir rejimi” adlı yeniliyini istifadəyə verməyə başlayıb.
Təmir rejimi xüsusiyyəti necə işləyəcək?
Yenilik ilk dəfə Samsung şirkətinin vətəni olan Cənubi Koreyada istifadəyə verilib. Samsung tərəfindən hazırlanan “təmir rejimi” xüsusiyyəti Android smartfonların təhlükəsizlik rejiminin (safe mode) təkmilləşdirilmiş halına bənzəyir.
Bu xüsusiyyəti aktivləşdirdikdə smartfon özünü yenidən başladır. Açıldıqdan sonra isə şəkilləriniz, smartfondakı hesablarınız, mesajlarınız və.s daxil olmaqla şəxsi məlumatlarınızın yer aldığı bütün bölmələr qapadılır. Smartfon bu rejimdə adətən format edilmiş kimi yalnız başlanğıc tətbiqlərini göstərir. Təmir rejimindən çıxmaq üçün isə yalnız barmaq izi və ya təyin etdiyiniz şifrədən istifadə etməyiniz lazım gəlir. Təmiri həyata keçirən şəxsin bu rejimi qapatması qeyri-mümkün olur. Beləliklə, bu yolla ən azından məlumatlarınıza birbaşa çıxış əldə edilməsinin qarşısı alınır.
Samsung şirkəti “təmir rejimi” xüsusiyyətini ilk olaraq Galaxy S21 seriyasına yeniləmə ilə əlavə edəcək. Digər Galaxy modellərinə isə bu yeniliyin gəlməsi bir neçə ay çəkə bilər. Sammobile tərəfindən verilən məlumata görə şirkət əvvəlcə Cənubi Koreya xarici digər bölgələrdəki flaqman modellərində bu rejimi aktivləşdirməyi planlaşdırır. Azərbaycana bu yeniliyin nə zaman çatacağı təəssüf ki, məlum deyil.
