Süni intellektin qrafik dizaynerlərin işini xeyli dəyişdirəcəyi məlumdur. Belə ki, süni intellekt qrafiki adlandırdığımız yeni sektorun ortaya çıxmasına doğru irəliləyən bu prosesdə qabağa düşən şirkət və ya şəxslər ön planda olacaqlar. Gözlənilməz də olsa bu sahədə ilk və vacib addımlardan birini məhz Microsoft şirkəti atdığını açıqlayıb. Verilmiş məlumata görə Microsoft şirkəti DALL-E və Stable Diffusion süni intellekt sistemləri əsaslı Canva bənzəri möhtəşəm bir qrafik dizayn tətbiqi hazırlayır. Üstəlik Microsoft Designer adlı bu tətbiqin brauzer ilə də işləyəcəyi gözlənilir.
Süni intellekt ilə stok şəkil axtarmaq yerinə öz şəkillərinizi özünüz hazırlayacaqsınız
Microsoft Designer tətbiqinin DALL-E və Stable Diffusion süni intellekt sistemlərindən yaranması sizə çox geniş imkanlar gətirir. Sadəcə Designer tətbiqinə daxil olub, yaratmaq istədiyiniz şəkil barədə detalları uyğun bölməyə yazırsınız. Daha sonra süni intellekt ilə Designer tətbiqi sizin üçün yazdığınız sözlərə və fantaziyanıza uyğun şəkillər hazırlayır. Hətta şəkili hazırlamaqla qalmayıb, yazı detallarına qədər nəyin necə olacağına qərar verməyiniz üçün çeşidlilik imkanı tanıyır. Bəlkə də normalda saatlarınızı xərcləyərək hazırlayacağınız bir posteri, sadəcə sözlər hesabına dəqiqələr ərzində ortaya çıxarmaq mümkün olur.
Süni intellekt əsaslı Microsoft Designer tətbiqinin ilkin test mərhələsində iştirak etmək üçün qeydiyyat prosesi artıq başlayıb. Qeydiyyatdan keçib test üçün təsdiq aldığınız təqdirdə tətbiqi sınaqdan keçirə biləcəksiniz. Platformanın eyni zamanda Microsoft 365 abunəçiləri üçün də qısa zaman ərzində ödənişsiz formada aktiv olacağı bildirilir. Ümumi istifadəyə nə zaman əlçatan olacağı hələ ki, naməlum olsa da Canva tipli qrafik dizayn tətbiqlərini silkələyəcək qədər potensiala sahib olduğunu söyləməkdə fayda var.
Diqqətimizi çəkən digər bir detal isə Microsoft Designer tətbiqinin interfeysidir ki, fotorealistik üslubda hazırlandığını görmək mümkündür. Ola bilsin bu dizayn elementləri qarşıdakı illərdə Windows əməliyyat sisteminin yeni versiyalarında da qarşımıza çıxarıla bilər.
