Bir müddət əvvəl elektromobil dünyasının məşhur brendlərindən biri olan XPeng şirkətinin G9 elektromobili barədə məlumat vermişdik. İnnovativ nəqliyyat vasitələrinin inkişaf etdirilməsinə fokuslanan şirkət uçan avtomobillərin hazırlanmasında da sektorda aparıcı rola malik olmağa çalışır. Belə ki, ötən gün XPeng şirkəti Dubayda ilk uçan elektromobilini nümayiş etdirib. Tamamilə elektrikli platformaya sahib XPeng X2 rəsmi olaraq 2024-cü ildən etibarən təqribi 156.000$ qiymətə alıb uçmaq üçün əlçatan olacaq.
Nümayiş etdirilən XPeng X2 modeli uçan elektromobil kimi yalnız uçmaq qabiliyyətinə malik olub, yerdə hərəkət üçün nəzərdə tutulmayıb
Dubayda ictimaiyyətə açıq formada keçirilən tədbirdə 5-ci nəsil XPeng X2 modeli göstərilib. 5-ci nəsil XPeng X2 isə yalnız uçmaq üçün nəzərdə tutulduğundan yerdə hərəkət edə bilməz. Lakin 24 oktyabrda anons ediləcək 6-cı nəsil ilə birlikdə həm uçmaq, həm yerdə hərəkət etmək mümkün olacaq. Lakin 6-cı nəsil XPeng X2 modelinin seriya istehsalına yaxın 3 il ərzində girməyəcəyini və inkişaf mərhələsində olduğunu nəzərə alsaq, elə Dubayda göstərilən 5-ci nəsil barədə danışmağa davam edək.
Öz çəkisi tamamilə fiber materiallar işlədilməsi hesabına 560 kq çəkiyə malikdir. Maksimum 200 kq çəkiyə sahib 2 nəfərin isə eyni vaxtda uçması həyata keçirilə bilər. Bu zaman maksimum 130 km/s sürətlə 35 dəqiqə hərəkət etmək mümkün olur. Uçan elektromobil bunu tamamilə elektrikli güc qurğusu hesabına həyata keçirir. 2021-ci ildəki məlumatlarda 1000 metr yüksəkliyə çıxa biləcəyi qeyd edilirdi. Lakin hal-hazırda böyük bir ehtimalla təhlükəsizlik üçün yüksəklik limiti 300-500 metr aralığına, qanuni yüksəklik limiti isə 91 metrə qədər düşürülüb.
Həm əllə, həm avtonom idarə edilə bilən uçan elektromobil indiyə qədər avtonom testlərdə 15.000-dən çox uğurlu uçuş sınağı keçirib. Hər bir sərnişinin qarşısında uçuş məlumatlarını əks etdirən xüsusi bir ekran var. Sərnişinlər uçuş rejimlərində dəyişiklik etmək və səyahət parametrlərini dəyişdirmək üçün isə ortadakı ekrandan istifadə etməlidirlər.
Eyni zamanda gecə uçuşlarının da həyata keçirilməsi mümkündür. 4 tərəfdə olan 8 rotor mühərrikinin kənarlarında yaşıl, ağ, qırmızı və mavi işıqlandırmalar quraşdırılmışdır ki, gecələr də havada digər pilotlar üçün təhlükəsizlik minimuma endirilib. Tək sual altında qalan xüsusiyyəti isə batareyalarının neçə KVts olduğu və neçə dəqiqəyə doldurula bildiyi yönündədir. Avropa nümayişi isə bu ilin sonuna qədər baş tutacaq XPeng X2 5-ci nəsil modeli 2024-cü ildən etibarən seriya istehsalından çıxmış olacaq.
