Google şirkəti artıq 6 ildən çoxdur ki, Fuchsia adını verdiyi və Android üçün alternativ olaraq görülən əməliyyat sistemi üzərində işləyir. Lakin bu əməliyyat sistemi 2016-cı ildən bu yana dəfələrlə gündəmə gəlsə də Google şirkəti heç vaxt yekun bir məhsul göstərməyi bacarmayıb. Ehtimallara görə bunun səbəbi 2018-cı ildən sonra şirkətin Android əməliyyat sistemini təkmilləşdirmək üçün fokuslanmaq qərarı almasıdır. Buna baxmayaraq Fuchsia OS ötən illər ərzində ləğv edilməyib və daim yavaş-yavaş da olsa inkişaf etdirilib. Ortaya çıxan məlumatlara görə Google şirkəti 2023-cü ildən əməliyyat sistemini yekunlaşdırmağa çalışacaq.
Fuchsia əməliyyat sisteminin hansı məqsədi hələ də tam olaraq aydın deyil
Google, ötən ay Fuchsia əməliyyat sistemi üçün xüsusi bir “SDK (Software Development Kit) Bootcamp” tədbiri və Visual Studio Code əlavəsi yaradıb. Bu tədbirin və yaradılan vəsaitlərin əsas səbəbi məhz Fuchsia OS üzərindən işləyən tətbiqlərin hazırlanmasıdır. Lakin Google şirkəti sıfırdan Fuchsia əməliyyat sistemi üzərində işləyən tətbiqlərdən əlavə, Android tətbiqlərinin də inteqrasiyası üçün ciddi iş görür.
Belə ki, Starnix adlandırılan layihəsi çərçivəsində Google şirkəti, Android və Linux tətbiqlərini Fuchsia əməliyyat sistemi ilə işlətməyə çalışır. Böyük bir ehtimalla Harmony OS kimi çeşidli cihazlarda işləyə bilən və eyni zamanda Android üçün yazılmış Google Servisləri, tətbiqlərini dəstəkləyəcək Fuchsia OS, çoxməqsədli əməliyyat sistemlərindən biri olacaq. Lakin Google şirkəti əməliyyat sisteminin tam olaraq hansı məqsədə xitab edəcəyini rəsmi olaraq bildirmir. Çünki, elə şirkətin öz məhsulu olan açıq qaynaqlı Android əməliyyat sistemi Fuchsia üçün ciddi bir rəqib rolundadır.
Əməliyyat sisteminin ən əsas fərqi Android və Chrome OS kimi məhsullardan fərqli olaraq “Zircon” nüvəsi üzərinə yaradılmasıdır. Zircon nüvəsi təməl olaraq Linux nüvəsinin kodlandığı C dili əvəzinə C++ dili ilə kodlanır. Nəticədə Zircon nüvəli bu əməliyyat sistemi proqram təminatı və texniki təminat (hardware) arasında əlaqəni daha yaxşı quran, emal gücü və emal edilmiş məlumatın ötürülməsi kimi proseslərdə effektivlik təmin edən mikro nüvədir. Eyni zamanda Linux nüvəsindən fərqli olaraq daim yenilənə bilən quruluşa malikdir. Fuchsia əməliyyat sisteminin imkanlarını görmək üçün böyük bir ehtimalla daha bir neçə il gözləməli olacağıq. Çünki, Google şirkəti Fuchsia əməliyyat sisteminə indiyə qədər sadəcə cihazları sınaqdan keçirmək üçün bir test vasitəsi kimi yanaşıb.
